फरार सूचीमा रहेका टोपबहादुर रायमाझीको खोजी गर्दै प्रहरी

नक्कली भुटानी शरणार्थी प्रकरण

दियो पोस्ट  

काठमाडौं । नक्कली भुटानी शरणार्थी प्रकरणमा पक्राउ पुर्जी जारी भएका नेकपा (एमाले) का सचिव एवं प्रतिनिधि सभा सदस्य टोपबहादुर रायमाझी फरार भएका छन्।

बुधबार पक्राउ पुर्जी जारी भएका उनी बिहीबार प्रहरी कार्यालयमा उपस्थित हुने प्रहरीको अपेक्षा थियो। प्रहरी उच्च स्रोतका अनुसार बिहीबार साँझसम्म सम्पर्कमा नआएर उनी फरार भएका हुन्।

बुधबार साँझ गृहजिल्ला अर्घाखाँचीमा भएको एउटा कार्यक्रम सकेर रायमाझी बुटवल आएका थिए। आफूविरूद्ध पक्राउ पुर्जी जारी भएपछि उनी सञ्चारकर्मीलाई अनुसन्धानमा सहयोग गर्ने प्रतिक्रिया दिएर अर्घाखाँचीबाट हिँडेका थिए। पछिल्लो समय उनको फोन स्विच अफ छ।

प्रतिनिधि सभाका सभामुख देवराज घिमिरे र रायमाझी अर्घाखाँचीको कार्यक्रममा सँगै थिए। उनीहरू दुई जना सँगै बुटवलसम्म आएका थिए।

रायमाझी बुधबार बुटवल बस्ने भन्दै एउटा होटलमा कोठा समेत रोकेका थिए। तर पक्राउ पुर्जी जारी भएपछि कोठा रद्द गरी बुधबार राति नै भैरहवाबाट काठमाडौंका लागि जहाजको टिकट लिएका थिए।

पछि उनी जहाजको टिकट पनि रद्द गरी सम्पर्कविहीन भएको रूपन्देही प्रहरीको भनाइ छ।

प्रहरीले बिहीबारदेखि उनको खोजी गरिरहेको छ। रायमाझी फरार भए पनि यो प्रकरणक अनुसन्धान निरन्तर अघि बढ्ने प्रहरीको भनाइ छ।

यही प्रकरणमा पक्राउ पुर्जी जारी भएका पूर्वगृहमन्त्री रामबहादुर थापा ‘बादल’ का छोरा प्रतीक थापालाई पनि अहिलेसम्म प्रहरी पक्राउ गरेको छैन।

प्रहरीले प्रतीकलाई पनि खोजिरहेको छ। पक्राउ पुर्जी जारी भएपछि बिहीबार एक वक्तव्य जारी गर्दै उनले आफू निर्दोष रहेको र प्रहरीको अनुसन्धानमा सहयोग गर्ने बताएका थिए।