छुट्टाछुट्टै सवारी दुर्घटनामा ३ जनाको मृत्यु

काठमाडौं । विभिन्न स्थानमा सवारी दुघर्टना हुँदा ३ जनाको मृत्यु भएको छ । प्युठानको सरुमारानी गाउँपालिका–६ मोतिपुरस्थित सडकमा लु.५८ प ६१२० नम्बरको मोटरसाइकल आफै अनियन्त्रित भई दुर्घटना हुँदा एक जनाको मृत्यु भएको छ ।
मृत्यु हुनेमा चालक सिमरुक गाउँपालिका–४ बस्ने २५ वर्षीय सेरा शुलभ साह रहेका छन् । दुघर्टनामा गम्भीर घाइते भएका उनको जिल्ला अस्पताल बिजुवार प्युठानमा उपचारको क्रममा मृत्यु भएको हो ।

यसैगरी बाँकेको नेपालगंज उपमहानगरपालिका–२२ पुरैनीस्थित सडकमा भे.१ ख २२७१ नम्बरको टिपरले युपि ४० जे १२१७ नम्बरको मोटरसाइकललाई मंगलबार दिउँसो ठक्करदिँदा मोटरसाइकल चालक भारत बहराइच थाना रूपैडिया रामपुर बस्ने २५ वर्षीय सुरेशतेलीको मृत्यु भएको छ । ठोक्करबाट गम्भीर घाइते भएका उनको भेरी अस्पताल नेपालगंज बाँकेमा उपचारको क्रममा मृत्यु भएको हो । टिपर चालकलाई प्रहरीले नियन्त्रणमा लिएको छ ।

यसैगरी सिरहाको मिर्चैया नगरपालिका–७ चुरिया जंगलस्थित सडकमा सिन्धुली दुधौलीबाट मिर्चैया कटारी चोकतर्फ जाँदै गरेको स.१ त १९५७ नम्बरको ट्याक्टर नियन्त्रित भइ मंगलबार राति दुर्घटना भएको छ । दर्घटनामा गाडी चालक सिरहा गोलबजार बस्ने ५५ वर्षीय अमर बहादुर श्रेष्ठको घटनास्थलमै मृत्यु भएको छ ।