एकतानजिक पुगे फोरम र नयाँ शक्ति
काठमाडौँ,वैशाख २० । संघीय समाजवादी फोरम र नयाँ शक्ति पार्टीबीच आउँदो सोमबार (२३ वैशाखमा) एकीकरण गर्ने गरी वार्ता अन्तिम चरणमा पुगेको छ । आइतबारसम्म दुवै पार्टीले आफ्ना केन्द्रीय समितिबाट एकतासम्बन्धी निर्णय गर्ने तयारी गरेका छन् । सोमबार संयुक्त केन्द्रीय समिति बैठकबाट एकताको निर्णय गर्ने र लगत्तै औपचारिक घोषणा गर्ने समझदारी छ ।
-२३ वैशाखमा एकीकरण तयारी
– नाम : समाजवादी पार्टी नेपाल
-भट्टराई र यादव दुवै अध्यक्ष
-६ महिनामा महाधिवेशन
स्रोतका अनुसार एकीकरणपछि पार्टीको नाम समाजवादी पार्टी रहनेछ । नेतृत्व वरीयतामा नयाँ शक्तिका संयोजक डा. बाबुराम भट्टराई वरिष्ठ रहने गरी अध्यक्ष हुनेछन् । फोरम अध्यक्ष उपेन्द्र यादव नयाँ पार्टीको कार्यकारी अध्यक्ष हुने सहमति छ । नयाँ शक्ति नेता नवराज सुवेदीले दुवैजना अध्यक्ष रहने सहमति भएको जानकारी दिए । दुवै दलका पदाधिकारी र केन्द्रीय सदस्य यथावत् रहने र महाधिवेशन आगामी ६ महिनामा सम्पन्न गर्न दुवै पक्ष सहमत छन् । पार्टीले कार्यदिशामा समाजवाद राख्ने भएको छ ।
दुवै नेताको कम्युनिस्ट पृष्ठभूमि
डा. बाबुराम भट्टराई मोहनविक्रम सिंह नेतृत्वको मसाल हुँदै प्रचण्ड
नेतृत्वको नेकपा माओवादीमा दश वर्ष सशस्त्र युद्धमा थिए । भट्टराईले ०७३
वैशाख३० गते आफ्नै नेतृत्वमा नयाँ शक्ति गठन गरे । अहिले भने परम्परागत
कम्युनिस्ट विचारबाट देश समृद्ध हुन नसक्ने उनको धारणा छ । पुष्पलाल
श्रेष्ठ समूहबाट राजनीतिमा आएका यादव ०४७ सालमा माले–माक्र्सवादी एकतापछि
एमालेमा सक्रिय भए ।
उनी एमालेबाट ०४८ को संसदीय निर्वाचनमा सुनसरी क्षेत्र नम्बर ४ मा कांग्रेस नेता विजय गच्छदारबाट पराजित भए । ०५४ सालमा मधेसी जनअधिकार फोरम नामक गैरसरकारी संस्था स्थापना गरे । मधेस आन्दोलनसँगै फोरमलाई उनले पार्टीका रूपमा दर्ता गरेर सक्रिय भए । तीनपटक मधेस आन्दोलनको नेतृत्वदायी भूमिकामा रहेका यादव आफूलाई सामाजिक लोकतन्त्रवादी भन्न रुचाउँछन् ।
राजनीतिक उतारचढाव
डा.भट्टराई
- ०३९ सालमा कम्युनिस्ट पार्टी सदस्यता । मोहनविक्रम सिंह नेतृत्वको नेकपा चौममा आबद्ध भई राजनीति सुरु ।
- ०४८ सालमा मोहनविक्रम सिंह नेतृत्वको मसाल छाडी तत्कालीन एकताकेन्द्रसँग एकीकरण ।
- ०५२ देखि सञ्चालित माओवादी जनयुद्धमा शीर्ष तहको नेतृत्वमा ।
- ०६४ मा पहिलो संविधानसभामा गोरखा क्षेत्र नम्बर २ बाट विजयी
- ०६५ सालदेखि एकीकृत माओवादीको उपाध्यक्ष
- ०६५ सालमा प्रचण्ड प्रधानमन्त्रीत्वको सरकारमा अर्थमन्त्री
- ०६८ असोज १२ गतेदेखि ०६९ फागुन ३० गतेसम्म प्रधानमन्त्री
- ३ असोज ०७२ मा संविधान जारी भएपछि ९ असोजमा एमाओवादी र संसद् सदस्य पदत्याग ।
- -३० जेठ ०७३ मा नयाँ शक्ति पार्टी गठन ।
- ०७४ मंसिर प्रतिनिधि सभा निर्वाचनमा गोरखा २ बाट निर्वाचित
यादव
- ०४७मा मालेसँग नेकपा माक्र्सवादी एकतापछि एमालेमा
- ०४८को निर्वाचनमा सुनसरी ४ बाट विजय गच्छादारसँग पराजित
- ०५४ देखि मधेसी जनअधिकार फोरम स्थापना
- ०६४ माघ २ मा अन्तरिम संविधान जलाएर आन्दोलन घोषणा
- ०६४ पहिलो संविधान सभामा मोरङ ५ र सुनसरी ५ बाट निर्वाचित
- ०६५ सालमा प्रचण्ड नेतृत्वको सरकारमा परराष्ट्रमन्त्री
- ०७० सुनसरी क्षेत्र नम्बर ५ बाट निर्वाचित
- ०६७ झलनाथ खनाल नेतृत्वको सरकारमा उप्रधानसहित परराष्ट्रमन्त्री
- ०७४ मा प्रतिनिधिसभामा सप्तरी २ बाट निर्वाचत
- ०७४ यता (हाल) उपप्रधान तथा स्वास्थ्यमन्त्री
पार्टी एकता टुंगिएमा फोरमले २८ वैशाखदेखि तोकेको महाधिवेशन स्थगित गर्ने सहमति
यस्तो छ एकीकरण तयारी
‘वैशाख २३ गते ११ बजे नयाँ शक्ति र हाम्रो पार्टीको संयुक्त केन्द्रीय समिति बैठक बोलाएको छ,’ फोरमका एक केन्द्रीय नेताले नयाँ पत्रिकासँग भने, ‘केन्द्रीय समितिले औपचारिक निर्णय गर्ने र घोषणा सभा गर्ने समयतालिका तय भएको छ ।’ उनका अनुसार एकताबारे निर्णय गर्न फोरमले शनिबार केन्द्रीय समिति बैठक बोलाएको छ । नयाँ शक्तिले भने शुक्रबार संघीय परिषद्को बैठक डाकेको छ । उसले शनिबार महाधिवेशन आयोजक समिति बैठक बोलाएको नेता देवेन्द्र पराजुलीले जानकारी दिए ।
एकता वार्तामा फोरमबाट अशोक राई, राजेन्द्र श्रेष्ठ र रकम चेम्जोङ छन् । नयाँ शक्तिबाट नवराज सुवेदी, परशुराम खापुङ, गंगानारायण श्रेष्ठलगायतले गृहकार्य गरिरहेका छन् । नयाँ शक्तिका नेता सुवेदीले पार्टी एकताबारे टुंगो लागिसकेको तर केही विषयमा अझै वार्ता भइरहेको बताए । ‘हामीले एकताका धेरै विषय टुंग्याइसक्यौँ,’ सुवेदीले भने, ‘बाँकी विषय अध्यक्षद्वयको जिम्मामा छाडेका छौँ ।’ पार्टी एकता टुंगिएमा फोरमले २८ वैशाखदेखि तोकेको महाधिवेशन स्थगित गर्ने सहमति छ ।
फोरम सरकारबाट बाहिरिन सक्ने
दुई पार्टी एक भए फोरम सरकारबाट बाहिरिन सक्ने नयाँ शक्ति नेता सुवेदीले बताए । नयाँ शक्तिले सुरुमै फोरम सरकारबाट बाहिरनुपर्ने अडान राखेको थियो । समयसीमा तोकेर सरकारसँग माग पूरा गर्न दबाब दिने र पछि सरकार छाडेर आन्दोलनमा जानेबारे भट्टराई र यादवबीच भद्र सहमति भएको निकटस्थ नेताहरूले बताए ।
प्रतिनिधिसभामा फोरमको १६ सदस्य छन् भने प्रदेश सभामा २९ सदस्य छन् । यादव उपप्रधानमन्त्रीसहित स्वास्थ्य तथा जनसंख्यामन्त्री छन् । फोरमबाटै मोहम्मद इस्तियाक राई सहरी विकासमन्त्री छन् । नयाँ शक्तिबाट भने भट्टराई मात्रै प्रतिनिधिसभामा छन् । प्रदेश ३ संसद्मा नयाँ शक्तिका २ सदस्य छन् ।
राजपा र जनमुक्ति पार्टीसँग पनि छलफल
एकताबारे नयाँ शक्ति संयोजक भट्टराईले
बिहीबार राजपा र जनमुक्ति पार्टीसँग पनि छलफल गरेका छन् । नयाँ शक्ति
कार्यालय बबरमहलमा राजपा अध्यक्षमण्डलका सदस्यद्वय महन्थ ठाकुर र राजेन्द्र
महतो, फोरम अध्यक्ष उपेन्द्र यादव र राष्ट्रिय जनमुक्ति पार्टीका नेता
छलफलमा सहभागी थिए ।
‘हामीले सरकारबाहिर भएका विभिन्न शक्तिसँग एकताका लागि छलफल गरेका छौँ,’
भट्टराईले भने, ‘एकता कसैसँग पनि टुंगिएको छैन । वातावरण भने सकारात्मक
बन्दै गएको छ ।’
गत वर्ष हुन नसकेको एकता
स्थानीय तहको तेस्रो चरणको निर्वाचनअघि भट्टराईले फोरमसँग एकता प्रस्ताव गरेका थिए । यादव र भट्टराई दुवैले अध्यक्षमा दाबी गरेपछि एकता हुन नसकेको नेताहरूको भनाइ छ । अघिल्लो वर्ष नयाँ शक्तिमा रहेको पूर्वमाओवादी समूह र फोरममा नेता राजेन्द्र श्रेष्ठलगायत समूह एकताका पक्षमा नदेखिएको बताइन्थ्यो । अहिले भने श्रेष्ठलगायतकै समूहले एकताको सूत्रधारको काम गरेको नेताहरू बताउँछन् । शुक्रबारको नयाँ पत्रिकामा खबर छ ।
