यी हुन् नेपालमा भएका ठूला हवाई दुर्घटना, कुन दुर्घटनाका कति जनाले ज्यान गुमाए ?

diyopost.com
दियो पोस्ट  सोमबार, जेठ १६, २०७९ | १५:४३:३१

काठमाडौं । मुस्ताङ जिल्लामा तारा एअरको विमान दुर्घटनामा परेकामध्ये सोमवार दिउँसोसम्म १६ जनाको शव बराबद गरिएको नेपाल नागरिक उड्डयन प्राधिकरणले जनाएको छ।

प्राधिकरणका अनुसार पोखराबाट जोमसोमका लागि आइतवार बिहान उडेको विमानसँग केही मिनेटपछि सम्पर्क टुटेको थियो।

अधिकारीहरूका अनुसार विमानमा चारजना भारतीय, दुईजना जर्मन र बाँकी नेपाली नागरिक सवार थिए।

यसअघि नेपालमा भएका विभिन्न हवाई दुर्घटनामा परी सयौँ व्यक्तिले ज्यान गुमाएका तथ्याङ्क छन्।

नेपालमा भएका केही विमान दुर्घटनाः

 

  • एप्रिल २०१९ – सोलुखुम्बु जिल्लाको लुक्ला विमानस्थलमा समिट एअरको एउटा विमान धावनमार्गको छेउमा रहेका दुईवटा हेलिकप्टरमा गएर ठोकिँदा कम्तीमा तीन जनाको मृत्यु
  • फेब्रुअरी २०१९ – एअर डाइनेस्टीको हेलिकप्टर ताप्लेजुङमा पाथीभरानजिकै दुर्घटनामा पर्दा तत्कालीन संस्कृति, पर्यटन तथा नागरिक उड्डयनमन्त्री रवीन्द्र अधिकारीसहित सात जनाको मृत्यु
  • सेप्टेम्बर २०१८ – गोर्खाबाट काठमाण्डू आउँदै गरेको एल्टिट्यूड एअरको हेलिकप्टर धादिङ र नुवाकोटबीच रहेको एउटा जङ्गलमा दुर्घटनाग्रस्त, एक जापानी पर्यटक र अन्य पाँच जनाको मृत्यु
  • मार्च २०१८ – बाङ्ग्लादेशबाट नेपाल आएको यूएस-बाङ्ग्ला एअरलाइन्सको विमान त्रिभुवन अन्तर्राष्ट्रिय विमानस्थलमा दुर्घटनाग्रस्त, ५१ जनाको मृत्यु
  • फेब्रुअरी २०१६ – पोखराबाट जोमसोम उडेको तारा एअरको विमान दुर्घटनाग्रस्त, २३ जनाको मृत्यु
  • मे २०१५ – भूकम्पपछिको राहत तथा उद्धारकार्यमा खटिएको अमेरिकी सेनाको हेलिकप्टर चरीकोटनजिकै दुर्घटनाग्रस्त; छ अमेरिकी सैनिक, दुई नेपाली सेनाका अधिकारी र पाँच सर्वसाधारणको मृत्यु
  • जुन २०१५ – सिन्धुपाल्चोकमा भूकम्पको राहत तथा उद्धारमा गएको डक्टर्स विदाउट बोर्डसले चार्टर गरेको हेलिकप्टर दुर्घटना हुँदा चार जनाको मृत्यु
  • मार्च २०१५ – त्रिभुवन अन्तर्राष्ट्रिय विमानस्थलमा हुस्सुका कारण टर्किश एअरको विमान धावन मार्गबाट चिप्लिँदा चार दिन विमानस्थल बन्द
  • फेब्रुअरी २०१४ – पोखराबाट जुम्ला उडेको नेपाल वायुसेवा निगमको विमान अर्घाखाँचीमा दुर्घटनाग्रस्त हुँदा १८ जनाको मृत्यु
  • सेप्टेम्बर २०१२ – काठमाण्डूबाट लुक्ला उडेको सीता एअरको विमान त्रिभुवन अन्तर्राष्ट्रिय विमानस्थलनजिकै दुर्घटनाग्रस्त, विमानमा रहेका सबै १९ जनाको मृत्यु
  • मे २०१२ – भारतीय तीर्थयात्री बोकेर पोखराबाट जोमसोम उडेको अग्नि एअरको विमान जोमसोम विमानस्थलनजिकै दुर्घटनाग्रस्त, १९ जनाको मृत्यु
  • सेप्टेम्बर २०११ – हिमालको दृश्यावलोकनक अर्थात् माउन्टेन फ्लाइटका लागि उडेको बुद्ध एअरको एउटा विमान काठमाण्डूनजिकै कोतडाँडामा दुर्घटनाग्रस्त; नेपाली, भारतीय, र अन्य देशका नागरिकसहित १४ जनाको मृत्यु
  • डिसेम्बर २०१० – लामीडाँडाबाट काठमाण्डू उडेको विमान ओखलढुङ्गामा दुर्घटनामा पर्दा १९ यात्री र चालकदलका तीन सदस्यको मृत्यु
  • अगस्ट २०१० – काठमाण्डूबाट लुक्लातर्फ उडेको विमान दुर्घटनामा पर्दा १४ जनाको मृत्यु
  • अक्टोबर २००८ – लुक्ला विमानस्थलमा अवतरण गर्ने बेला दुर्घटनामा १८ जनाको मृत्यु, एक जना घाइते
  • सेप्टेम्बर २००६ – सङ्खुवासभाको घुन्सामा श्री एअरको हेलिकप्टर दुर्घटनामा पर्दा २४ जनाको मृत्यु, मृत्यु हुनेमा वन तथा भूसंरक्षण राज्यमन्त्री गोपाल राई, संरक्षणविद् डा. हर्क गुरुङ, डा. सीबी गुरुङ, तीर्थमान मास्के

विज्ञ के भन्छन्?

नेपालमा हुने गरेका हवाई दुर्घटनालाई लिएर देशभित्र र बाहिरबाट प्रश्नहरू उठ्दै आएका छन्।

बारम्बार हुने गरेका हवाई दुर्घटनाका विभिन्न कारण रहेको विज्ञहरू औँल्याउँछन्।

तीमध्ये लापरवाही एउटा प्रमुख कारण रहेको हवाई उडानसम्बन्धी एकजना विज्ञले बीबीसीलाई बताए।

“हामीकहाँ भएका हवाई दुर्घटनामध्ये ९० प्रतिशतमा लापरवाही नै प्रमुख कारणको रूपमा देखिन्छ,” कुमार चालिसेले सँग भने।

“विमान उडाउने पेशाको संवेदनशीलता अनुसार साँच्चिकै हामी जिम्मेवारी सम्हाल्न नसक्ने नै हौँ त?” उनले प्रतिप्रश्न गरे।

“थुप्रै विदेशी पाइलटले हामीकहाँ हेलिकप्टर उडाइरहेका छन्। उनीहरूभन्दा हाम्रा पाइलटले चलाउने विमान किन धेरै दुर्घटनामा पर्ने गरेका छन् त?”

नेपालमा भएका कतिपय हवाई दुर्घटनामा पाइलटलाई दिइने दबाव पनि एउटा कारणको रूपमा रहेको अवकाशप्राप्त पाइलट प्रचण्डजङ्ग शाह औँल्याउँछन्।

“हामीकहाँ प्रेसर कल्चर [दबावको संस्कृति] छ। त्यसले गर्दा पनि दुर्घटना भएको छानबिनबाट देखिएका छन्,” उनले भने।

त्यसका ज्वलन्त उदाहरणका रूपमा तत्कालीन पर्यटन तथा नागरिक उड्डयनमन्त्री रवीन्द्र अधिकारी सवार हेलिकप्टर दुर्घटना अनि तत्कालीन वन तथा भूसंरक्षण राज्यमन्त्री गोपाल राई सवार अर्को हेलिकप्टर दुर्घटनालाई विज्ञहरूले अघि सार्ने गरेका छन्।

“हाम्रो जस्तो भौगोलिक अवस्था भएको ठाउँमा विमान उडाउँदा थप सतर्कता अपनाउनुपर्ने हुन्छ। जति कठिन अवस्था हुन्छ त्यति नै नियमबद्ध हुनुपर्ने हुन्छ,” उनले थपे।

कतिपय अवस्थामा छानबिन समितिलाई स्वतन्त्र रूपमा प्रतिवेदन तयार पार्न नदिँदा पनि त्रुटि दोहोरिन नदिने दिशामा उपलब्धि हुन नसकेको केही छानबिन समितिमा बसिसकेका एकजना विज्ञले बताए।

“अनुसन्धानमा संलग्न विज्ञहरूमाथि स्वतन्त्र रूपमा प्रतिवेदन आउन नदिने गरी दबाव पनि दिने गरेको पाइएको छ,” नाम उल्लेख नगर्ने शर्तमा उनले भने। बीबीसीबाट 

 

सम्बन्धित खबर