काठमाडौं, १६ असोज ।राजधानीको पुतलीसडकमा रहेको राइट पाथ करियर काउन्सिल नामक कन्सल्टेन्सीले बेलायतस्थित हडर्सफिल्ड विश्वविद्यालयमा अध्ययन भिषामा पठाएको तीन दर्जनभन्दा बढी विद्यार्थीको विचल्ली भएको छ ।
कन्सल्टेन्सीले फाउन्डेसन कोर्स सजिलो छ, सकेपछि बेलायतमै तीन वर्षको भिसा बढ्छ भन्दै विद्यार्थीहरुलाई झूटो प्रलोभनमा पारी ठगी गर्ने गरेको पाइएको छ ।
एक विद्यार्थीले राजधानीकबाट प्रकाशित एक दैनिकलाई दिएको जानकारी अनुसार शुरुमा राइट पाथ करियर काउन्सिलले फाउन्डेशन कोर्श सजिलो छ शुरुमा तीन वर्षको भिषा बढ्छ भन्दै झूटो प्रलोभनमा पारेको पाइएको छ । गत जनवरीमा बेलायत आएकी ती विद्यार्थीले हडर्सफिल्ड पुगेपछि मात्र थाहा पाए त्यो लन्डनबाट करिब १९० माइल टाढा रहेको ।
‘सुरुमा कन्सल्टेन्सीले विश्वविद्यालयबाट लन्डन, म्यानचेस्टर र लिड्स नजिक छ । कामको चिन्ता लिनु पर्दैन भनेर झुक्यायो,’ उनको गुनासो छ ‘यहाँ आएपछि त काम पनि पाइएन । लकडाउनले पढाइ पनि अनलाइन मात्र सीमित भयो ।’
राइटपाथबाट बेलायत पुगेकी उनी बेरोजगारीको समस्यासँगै यतिबेला विश्व विद्यालयले लिनिे परिक्षामा समेत उत्तिर्ण हुन नसकेपछि घर न घाटकी बनेकी छिन् । विश्व विद्यालयले परिक्षालाई कारण देखाउँदै घर फर्कन ताकेता गर्न थालेको ती विद्यार्थीको भनाई छ ।
उनको भिसा आउँदो अक्टोबर ७ मा सकिने भएकाले अब नयाँ विश्वविद्यालयले भर्ना लिने सम्भावना ज्यादै न्यून छ । यदि कुनै विश्वविद्यालयले भर्ना लिइहाले पनि थप २० लाख रुपैयाँ जुटाउन ठूलो सकस छ ।
‘महामारीले पढ्ने वातावरण पनि भएन । अहिले न पैसा, न पढाइ भयो । यत्तिकै कुन मुख लिएर नेपाल फर्कनु ?’ उनले दुःखेसो पोखिन्, ‘अनलाइन पढाइयो भनेर विश्वविद्यालयले पैसा ‘रिफन्ड’ पनि गरेन । भिसा बढाउन ‘कन्फरमेसन अफ एसेप्टेन्स फर स्टडिज’ (कास) लेटर पनि दिएन ।’
११ हजार ८ सय पाउन्ड तिरेर फाउन्डेसन इन बिजनेस म्यानेजमेन्ट एन्ड ल कोर्समै आठ महिनाको भिजासहित फेब्रुअरी बेलायत आएका काठमाडौंका अनिल (नाम परिवर्तन) को पीडा पनि समान छ । एउटा मात्र ‘मोडुल’ फेल भए पनि विश्वविद्यालयले आफ्नो घर फर्कनुको विकल्प नभएको बताएको उनले गुनासो गरे । विश्वविद्यालयका हरेक निकायमा आफूहरूले अन्तिम मौका दिन आग्रह गर्दा पनि सुनुवाइ नभएको उनको भनाइ छ ।
राइट पाथ कन्सल्टेन्सीले पहिलो वर्षको कोर्स सजिलो हुन्छ, त्यसपछि बेलायतमै तीन वर्ष भिसा थप्ने भनेपछि ढुक्क भएका उनले यस्तो स्थिति आउला भन्ने कल्पना नै गरेका थिएनन् । तर कोभिड–१९ का कारण अनलाइन पढाइमा फोकस हुन नसक्दा उनी फेल भए । विश्वविद्यालयले फेरि लिन अस्वीकार गरेको छ । अक्टोबर ७ मा उनको भिसा सकिँदै छ, थपिने सम्भावना भने नभएको उनले बताए ।
‘अर्को विश्वविद्यालय पाए पनि घरबाट पैसा झिकाउन सक्ने स्थिति छैन । नेपाल नै फर्कौं भने पनि हवाई भाडा करिब ३ लाख रुपैयाँ रहेछ,’ उनको दुःखेसो छ ।
२२ वर्षीय विशाल श्रेष्ठ (नाम परिवर्तन) ले पनि करिब १२ हजार पाउन्ड विश्वविद्यालयलाई तिरेका थिए । तर, आठ महिनाको भिसा पाए । कन्सल्टेन्सीले फाउन्डेसन कोर्स पास भएपछि चारवर्षे भिसा आउने प्रतिबद्धता जनाएको उनको भनाइ छ । फेब्रुअरी १० मा आएका उनी सातमध्ये एउटा मोडुलमा मात्र फेल भए । ‘पहिलो सेमेस्टरमा क्लास लिन पाएर सबै पास भएको थिएँ । तर, दोस्रो सेमेस्टर अनलाइन मात्र भएकाले केही बुझिन अनि फेल भएँ,’ उनले भने, ‘विश्वविद्यालयको इन्टरनेसनल स्टडी सेन्टरमा आफ्नो समस्या सुनाउँदा हामी लिन सक्दैनौं भन्छ । अक्टोबर ७ मा भिसा सकिँदै छ ।’
उनले नेपाल फर्कन हवाई भाडासमेत नभएको बताए । ‘१० घण्टामात्र काम गर्न पाउने अधिकार थियो तर कामै पाइनँ । खानबस्न धौधौ छ । ऋण गरेर आएको कसरी तिर्ने ?’ उनको गुनासो छ ।
राइटपाथमार्फत आएका उक्त विश्वविद्यालयमा अध्ययनरत करिब एक सय विद्यार्थीमध्ये झन्डै तीन दर्जन विद्यार्थी अनुत्तीर्ण भएका कारण नेपाल फर्कनुपर्ने बाध्यतामा छन् । तीन वर्षको भिसा हुने पनि फेल भएर फर्कनुपर्ने अवस्थामा रहेको विद्यार्थीको गुनासो छ ।
इक्यानका पूर्वअध्यक्ष विष्णुहरि पाण्डेसँग निकट सम्बन्ध भएका फिलिप डिसी राइटपाथ करियर काउन्सिलका अध्यक्ष हुन् । उनी लामो समय बेलायत समेत बसेर आएका व्यक्ति हुन् ।
