काठमाडौं । नेकपा (एमाले)ले गोरखा क्षेत्र नं-२ बाट मिलन गुरुङ (चक्रे मिलन)लाई उम्मेदवारका रूपमा सिफारिस गरेको छ । एमालेले आगामी फागुन २१ गते हुने प्रतिनिधि सभा सदस्य निर्वाचनका लागि विवादित पृष्ठभूमि भएका गुण्डा नाइके गुरुङलाई अघि सारेको हो ।
नेपाली कम्युनिष्ट पार्टी नेकपाका संयोजक तथा तत्कालिन नेकपा माओवादी केन्द्रका अध्यक्ष पुष्पकमल दाहाल प्रचण्डले जित हासिल गरेको यस क्षेत्रमा एमालेले गुरुङलाई अघि सारेपछि एमालेप्रति तीब्र आलोचना सुरु भएको छ ।
मिलन गुरुङ विगतमा गुन्डागर्दी र आपराधिक गतिविधिसँग जोडिएका आरोपका कारण चर्चामा आएका व्यक्ति हुन्। विभिन्न समयक्रममा उनी प्रहरी कारबाहीमा परेका, पक्राउ तथा धरौटीमा रिहा भएका थिए ।
यही पृष्ठभूमिका कारण एमालेको निर्णयप्रति सामाजिक सञ्जालदेखि राजनीतिक विश्लेषकसम्मले आलोचना गरिरहेका छन्।
तर एमालेका केही नेताहरूले भने गुरुङ लामो समयदेखि पार्टीसँग आबद्ध रहेको र पछिल्लो समय सामाजिक गतिविधिमा सक्रिय रहेको दाबी गरेका छन्। उनीहरूका अनुसार स्थानीय स्तरमा युवा पुस्तामाझ गुरुङको प्रभाव र चिनारीलाई ध्यानमा राखेर उम्मेदवार सिफारिस गरिएको हो।
गुरुङ स्वयंले पनि आफूलाई विगतका आरोपभन्दा अलग रूपमा प्रस्तुत गर्दै स्थानीय विकास र सामाजिक सेवाका एजेन्डा लिएर चुनावी प्रतिस्पर्धामा उत्रिन तयार रहेको बताएका छन्। उनले यो सिफारिस व्यक्तिगत चाहनाभन्दा पनि स्थानीय समर्थक र युवाहरूको दबाबका कारण आएको प्रतिक्रिया दिएका छन्।
यद्यपि, राजनीतिक विश्लेषकहरू भने गोरखा-२ जस्तो संवेदनशील र प्रतीकात्मक निर्वाचन क्षेत्रमा यस्तो उम्मेदवार अघि सार्नुले एमालेको छवि र चुनावी परिणाम दुवैमा असर पार्न सक्ने बताउँछन्।
प्रचण्डको परम्परागत क्षेत्रमा नयाँ र विवादित अनुहार प्रस्तुत गर्नु एमालेको आक्रामक राजनीतिक रणनीति हुनसक्ने उनीहरूको विश्लेषण छ।
चक्रे मिलनको उम्मेदवारी सिफारिसले गोरखा-२ को चुनावी राजनीति थप रोचक र विवादित बन्ने देखिएको छ।
