काठमाडौँ । सर्वोच्च अदालतले मेडिकल व्यवसायी दुर्गा प्रसाईंको बन्दीप्रत्यक्षीकरणसम्बन्धी रिटमा सरकारका नाममा कारण देखाउ आदेश जारी गरेको छ।
न्यायाधीश नृपध्वज निरौलाको एकल इजलासले विपक्षीका नाममा प्रसाईंलाई थुनामा राख्नुको आधार र कारण खुलाउन आदेश दिएको हो ।
अदालतले बाटोको म्यादबाहेक २४ घण्टाभित्र महान्यायाधिवक्ताको कार्यालयमार्फत लिखित जवाफ पेस गर्न निर्देशन दिएको छ ।
प्रसाईंकी पत्नी उमा प्रसाईंले गत भदौ ५ गते सर्वोच्च अदालतमा बन्दीप्रत्यक्षीकरणको रिट दायर गरेकी थिइन् । रिटमा प्रसाईंको घरमा गरिएको खानतलासीको विषयमा समेत प्रश्न उठाइएको छ।
यसैबीच, अदालतले गत भदौ ४ गते प्रसाईंको घरमा खानतलासीका क्रममा बरामद गरिएका भनिएका सामग्रीहरू समेत आगामी पेसीका दिन अदालतमा उपस्थित गराउन जिल्ला प्रहरी परिसर भक्तपुरलाई निर्देशन दिएको छ ।
