एजेन्सी। सन् २००७ को शरद ऋतुमा क्याटालन पत्रिका ‘डियारियो स्पोर्ट’ले एउटा परोपकारी फोटोसुटको आयोजना गर्दा, लिओनेल मेस्सीले सायदै सोचेका थिए होलान्- जुन शिशुलाई उनले नुहाइदिइरहेका छन्, उनीसँगै सन् २०२६ को फिफा विश्वकपको फाइनलमा भिडन्त हुनेछ। तर, कहिलेकाहीँ जिन्दगी यस्तै अनौठो गरी अघि बढ्छ।
साविक विजेता अर्जेन्टिना र स्पेनबिच सन् २०२६ को फिफा विश्वकपको फाइनल भिडन्त तय भएसँगै फुटबल जगतका महानायक लिओनेल मेस्सी र युवा सनसनी लामिन यमालको १९ वर्ष पुरानो एउटा दुर्लभ तस्बिरले विश्वभर चर्चा पाएको छ। सन् २००७ मा बार्सिलोनाको एउटा परोपकारी क्यालेन्डर फोटोसुटका क्रममा लिइएको उक्त तस्बिरमा तत्कालीन २० वर्षीय मेस्सीले एउटा प्लास्टिकको बाथटबमा पाँच महिनाका शिशु लामिन यमाललाई नुहाइदिइरहेका देखिन्छन्।
झण्डै दुई दशकअघिको यो संयोग अहिले फुटबल इतिहासकै सबैभन्दा रोमाञ्चक र भावनात्मक मोडमा आइपुगेको छ। त्यस समयका तिनै अबोध बालक यमाल अहिले १९ वर्षका भइसकेका छन् र स्पेनको अग्रपंक्तिको नेतृत्व गर्दै विश्वकपको उपाधि भिडन्तमा तिनै मेस्सीको सामना गर्न तयार छन्, जसले अर्जेन्टिनाको कमान्ड सम्हालिरहेका छन्। फुटबलको सबैभन्दा ठूलो मञ्चमा हुन लागेको यो आमनेसामनेलाई फ्यानहरूले एउटा ‘पूर्ण चक्र’ (फुल-सर्कल मोमेन्ट) का रूपमा हेरेका छन्।
यसरी जुटेको थियो संयोग
यो ऐतिहासिक तस्बिर खिच्ने स्वतन्त्र फोटोग्राफर जोआन मोनफोर्टका अनुसार क्याटालन पत्रिका ‘डियारियो स्पोर्ट’ले युनिसेफको सहयोगमा उक्त परोपकारी क्यालेन्डरको आयोजना गरेको थियो। संकलित रकम परोपकारी कार्यमा दान गर्ने उद्देश्यले राखिएको यो अभियानका लागि युनिसेफले यमालको परिवार बस्ने मातारोको रोका फोन्डा टोलमा एउटा चिठ्ठा (राफल) कार्यक्रम राखेको थियो। प्रतिष्ठित क्याम्प नोउ रंगशालामा बार्सिलोनाका खेलाडीसँग तस्बिर खिचाउनका लागि यमालको परिवारले फारम भरेको थियो र भाग्यवश उनीहरूले नै त्यो चिठ्ठा जिते।
करियरको सुरुआती चरणमा मेस्सी निकै लजालु स्वभावका भएकाले सुरुमा चेन्जिङ रुमभित्र शिशु यमाल र उनकी आमा सिला एबानासँगको त्यो भेट अलि असहज जस्तो भएको मोनफोर्ट सम्झिन्छन्। त्यसबेला कसैले कल्पनासम्म गरेका थिएनन् कि त्यो बाथटबको सानो शिशु भविष्यमा यति ठूलो खेलाडी बन्नेछ, न त कसैलाई यो नै थाहा थियो कि मेस्सी फुटबल जगतको यो उचाइसम्म पुग्नेछन्।
बुबाको क्याप्सन र यमालको उदय
यो तस्बिर पहिलोपटक स्पेनले युरो २०२४ को उपाधि जितेपछि यमालका बुबा मुनिर नस्राउईले इन्स्टाग्राममा सेयर गरेसँगै भाइरल भएको थियो। उनले तस्बिरको क्याप्सनमा “दुई लिजेन्डहरूको सुरुवात” लेख्दै मेस्सीको काखमा रहेका बालकदेखि दुवैजना विश्व फुटबलका ठूला तारा बन्नेसम्मको अद्भुत यात्रालाई चित्रण गरेका थिए।
पाँच महिनाको उमेरमा खिचिएको उक्त ऐतिहासिक क्षणको यमाल आफैँलाई भने कुनै सम्झना छैन। तर, त्यसयता उनले फुटबल मैदानमा तय गरेको यात्रा निकै तीव्र र लोभलाग्दो छ। सन् २०२३ मा बार्सिलोनाका लागि डेब्यु गरेका यमालले त्यसको केही महिनामै स्पेनको राष्ट्रिय टोलीमा स्थान बनाए र ला रोजा (स्पेन) लाई युरो २०२४ को च्याम्पियन बनाउन प्रमुख भूमिका खेले। १७ वर्षकै उमेरमा बालोन डी’ओरका लागि मनोनित भएर उनले इतिहास रचिसकेका छन्।
फाइनल यात्रा र गोल्डेन बुटको दौड
जारी विश्वकपमा दुवै टोली निकै सानदार प्रदर्शन गर्दै फाइनल पुगेका हुन्। स्पेनले मंगलबार (१४ जुलाई) फ्रान्सलाई २-० ले हराउँदै फाइनलमा आफ्नो स्थान सुरक्षित गरेको थियो। अर्कोतर्फ, बुधबार (१५ जुलाई) भएको दोस्रो सेमिफाइनलमा मेस्सीको कमान्डमा रहेको अर्जेन्टिनाले इंग्ल्यान्डविरुद्ध उत्कृष्ट पुनरागमन गर्यो। १-० ले पछि परेको स्थिति उल्ट्याउँदै अर्जेन्टिनाले इन्जुरी समयको गोलको मद्दतमा खेल २-१ ले आफ्नो पक्षमा पार्यो।
यससँगै सर्वाधिक गोलकर्ताको दौड (गोल्डेन बुट) मा मेस्सी फ्रान्सका किलियन एम्बाप्पेभन्दा केही अगाडि छन्। इंग्ल्यान्डविरुद्धको खेलमा गरेका दुई असिस्ट (गोलका लागि पास) का कारण मेस्सी यो दौडमा हाबी देखिएका हुन्।
अहिले सारा संसारले दुई सुपरस्टारहरूको यो अप्रत्याशित र ऐतिहासिक मिलनलाई निकै चासोका साथ हेरिरहेको छ।
आउँदो आइतबार, १९ जुलाईमा हुने महाभिडन्तमा मैदान उत्रिँदा युवा सनसनी यमालसँग आफ्नै बाल्यकालको तस्बिरका नायकलाई रोक्दै फिफा विश्वकपको ट्रफी उचाल्ने ऐतिहासिक मौका हुनेछ। खेलको नतिजा जेसुकै भए पनि, यसपटकको भेट भने यमालले पक्कै पनि सधैँ सम्झिरहनेछन्।
