काठमाडौँ । नेपाल कम्युनिष्ट पार्टी (एमाले)ले प्रतिनिधि सभाको सभामुख पदका लागि पार्टी उपाध्यक्ष गुरु बराललाई उम्मेदवार बनाउने तयारी गरेको छ। हाल प्रतिनिधि सभामा सीमित सिट भए पनि एमालेले सभामुख पदमा प्रतिस्पर्धा गर्ने निर्णय गरेको हो।
एमालेले संघीय संसद् सचिवालयलाई सभामुख पदमा उम्मेदवारी दिने विषयमा जानकारी गराइसकेको स्रोतले जनाएको छ। उम्मेदवारी दर्ताका लागि तोकिएको समयभित्रै औपचारिक प्रक्रिया पूरा गर्ने तयारी गरिएको छ।
पार्टीका एक नेताका अनुसार प्रमुख प्रतिपक्षी नेपाली कांग्रेसले उम्मेदवार उठाएमा एमालेले कांग्रेसलाई समर्थन गर्ने, तर कांग्रेसले उम्मेदवारी नदिए एमालेले आफ्नै उम्मेदवार अघि सार्ने रणनीति बनाएको छ।
बराल समानुपातिकतर्फबाट सांसद बनेका नेता हुन् र पार्टीभित्र वरिष्ठ नेताका रूपमा चिनिन्छन्। यसैबीच सत्तारुढ राष्ट्रिय स्वतन्त्र पार्टीले भने उपसभापति डीपी अर्याललाई सभामुखको उम्मेदवार बनाइसकेको छ। सभामुख चयनका लागि निर्वाचन आइतबार हुने तय भएको छ।
सभामुख चयन प्रक्रिया अघि बढ्दै जाँदा प्रमुख दलहरूबीच प्रतिस्पर्धा र सहकार्य दुवै सम्भावना खुला रहेको देखिएको छ।
