काठमाडौं । सेयर कारोबारी दिपेन्द्र अग्रवाल धरौटीमा रिहा भएका छन्। काठमाडौं जिल्ला अदालतको आदेशपछि अग्रवाल धरौटी रकम बुझाएर रिहा भएका हुन्।
अदालतले अग्रवाललाई झन्डै ४९ लाख रुपैयाँ धरौटी बुझाउने सर्तमा रिहा गर्न आदेश दिएको हो। अदालतले अनुसन्धानका लागि निरन्तर हिरासत आवश्यक नदेखिएको भन्दै धरौटीमा छाड्न आदेश दिएको जनाइएको छ।
नेपाल धितोपत्र बोर्ड (सेबोन)को उजुरीका आधारमा केन्द्रीय अनुसन्धान ब्यूरो (सीआईबी)ले अग्रवाललाई सेयर बजारमा भित्री कारोबार (इनसाइडर ट्रेडिङ) गरेको आरोपमा पक्राउ गरेको थियो। उनीमाथि धितोपत्रसम्बन्धी कानुन उल्लंघन गर्दै अवैध नाफा कमाएको आरोप छ।
सीआईबीका अनुसार अग्रवालले कम्पनीसम्बन्धी संवेदनशील सूचना सार्वजनिक हुनुअघि नै सेयर कारोबार गरी ठूलो नाफा कमाएको आशंका गरिएको छ। प्रारम्भिक अनुसन्धानमा उनले करिब ४९ लाख रुपैयाँभन्दा बढी लाभ लिएको देखिएको बताइएको छ।
अग्रवाल पुस ४ गते पक्राउ परेका थिए। अदालतको आदेशपछि उनी धरौटी बुझाएर रिहा भए पनि घटनासम्बन्धी अनुसन्धान भने जारी रहने सीआईबीले जनाएको छ।
यस प्रकरणलाई लिएर सेयर बजारमा नियमन र भित्री कारोबार नियन्त्रणको विषय पुनः चर्चामा आएको छ। नियामक निकायले यस्ता गतिविधिमाथि कडाइका साथ अनुसन्धान जारी राख्ने बताउँदै आएको छ।
