पछिल्लो २४ घण्टामा कास्कीको पञ्चासेमा सबैभन्दा बढी वर्षा
काठमाडौँ । पछिल्लो २४ घण्टामा कास्कीको पञ्चासे क्षेत्रमा देशकै सबैभन्दा बढी वर्षा मापन गरिएको छ। जलविज्ञान तथा जलस्रोत अनुसन्धान केन्द्रका अनुसार सो क्षेत्रमा १८९ मिलिमिटर वर्षा भएको हो ।
त्यसैगरी पाल्पाको अर्चलेमा १७२ मिलिमिटर, गुल्मीको भार्सेमा १७०.८ मिलिमिटर, म्याग्दीको कुहुनमा १६५.२ मिलिमिटर र दर्वाङमा १६१ मिलिमिटर वर्षा भएको छ।
हाल कैलालीको भजनी र धनगढी विमानस्थल, म्याग्दीको बेनी, पर्वतको कार्कीनेटा, पाल्पाको अर्चले तथा स्याङ्जाको पाँचमूल क्षेत्रमा वर्षा जारी रहेको मापन केन्द्रले जनाएको छ।
अविरल वर्षाका कारण बाँके, म्याग्दी, पर्वत, लमजुङ, चितवन र भोजपुरका विभिन्न नदीनालाहरूमा जलसतह बढेर सतर्कता तह नजिक पुगेको छ। बाढी मापन केन्द्रका अनुसार बाँकेको किरन नाला र म्याग्दीको मङ्गलघाटस्थित नदीमा जलसतहले सतर्कता तह पार गरिसकेकाले तटीय क्षेत्रका बासिन्दालाई उच्च सावधानी अपनाउन आग्रह गरिएको छ।
देशभर अधिकांश बादल
हाल देशभर मनसुनी वायुका साथै पश्चिमी वायुको पनि आंशिक प्रभाव रहेको मौसम पूर्वानुमान महाशाखाले जनाएको छ । भारतको छत्तीसगढ तथा उत्तरपूर्वी मध्य प्रदेशमा रहेको न्यून चापीय प्रणाली हाल उत्तरपश्चिमतर्फ सर्दै भारतको दक्षिणपूर्वी उत्तर प्रदेशतर्फ जाने र आगामी १२ घण्टामा क्रमशः कमजोर भई न्यून चापीय क्षेत्रमा परिणात हुने सम्भावना रहेको महाशाखाले उल्लेख गरेको छ ।
आज बिहानैदेखि काठमाडौँ उपत्यकामा वर्षा रोकिएको छ । हाल उपत्यकासहित देशभर अधिकांश बादल लागेको छ । गण्डकी, लुम्बिनी, कर्णाली र सुदूरपश्चिम प्रदेशका धेरै स्थानमा तथा बागमती प्रदेशका केही स्थान साथै कोशी र मधेसको थोरै स्थानमा हल्कादेखि मध्यम वर्षा भइरहेको छ ।
मधेस प्रदेश तथा बागमती, गण्डकी लुम्बिनी र सुदूरपश्चिम प्रदेशको तराई भू-भागका साथै बागमती, गण्डकी, लुम्बिनी र कर्णाली प्रदेशको पहाडी भू(भागका खोच तथा उपत्यकाको केही स्थानमा हावाहुरीको समेत सम्भावना रहेकोले ती क्षेत्रमा कृषि, स्वास्थ्य, पर्यटन, पर्वतारोहण, सडक तथा हवाई यातायात, उद्धार तथा राहतमा असर पर्ने सम्भावना रहेकाले आवश्यक सतर्कता अपनाउन विभागले आग्रह गरेको छ ।
