दिगोद्वारा उलन्स स्कुललाई ४० विद्युतीय भ्यान हस्तान्तरण
काठमाडौँ । नेपालमा विद्युतीय सवारीसाधनको प्रवर्द्धनमा सक्रिय दिगोले उलन्स स्कुललाई १६ सिट क्षमताका ४० वटा विद्युतीय भ्यान हस्तान्तरण गरेको छ।
अक्टोबर ९ (असोज २३) मा आयोजित कार्यक्रममा सवारी निर्माता कम्पनीका प्रतिनिधि झु सियानसोंगले दिगो र उलन्स स्कुलका प्रतिनिधिहरूको उपस्थितिमा भ्यानहरू औपचारिक रूपमा हस्तान्तरण गरेका हुन् ।
विद्यालयको दैनिक यातायातलाई सहज, भरपर्दो र वातावरणमैत्री बनाउने उद्देश्यले भ्यानहरू उपलब्ध गराइएको दिगोले जनाएको छ। चीनको सीएचटीसी कम्पनीद्वारा निर्मित १६ सिट क्षमताका यी विद्युतीय भ्यानले सञ्चालन खर्च कम गर्ने, प्रदूषण घटाउने र शान्त यात्राको सुविधा दिने अपेक्षा गरिएको छ।
४० वटा विद्युतीय भ्यान आफ्नो यातायात समूहमा थपेसँगै उलन्स स्कुलले परम्परागत इन्धनबाट चल्ने सवारीसाधनमाथिको निर्भरता घटाउँदै आधुनिक र वातावरणमैत्री यातायात प्रणालीतर्फ कदम चालेको छ।
दिगोका समूह प्रमुख कार्यकारी अधिकृत सौरभ श्रेष्ठले उलन्स स्कुललाई ४० वटा विद्युतीय भ्यान हस्तान्तरण गर्नु कम्पनीका लागि महत्त्वपूर्ण उपलब्धि भएको बताए। विद्यालयले दिगोप्रति देखाएको विश्वासले विद्युतीय सवारीसाधनको विस्तार र यससँग सम्बन्धित समग्र प्रणाली निर्माणमा भइरहेको प्रयासलाई थप प्रोत्साहन गरेको उनको भनाइ छ।
त्यस्तै, उलन्स स्कुलकी प्रधानाध्यापक एकता सिंह राणाले विद्युतीय भ्यान थपिनु विद्यालयको यातायात सेवालाई प्रभावकारी र वातावरणप्रति जिम्मेवार बनाउने प्रयासमा महत्त्वपूर्ण कदम भएको बताइन्। स्वच्छ र दिगो यातायात प्रणालीतर्फ अघि बढ्न दिगोसँग सहकार्य गर्न पाउँदा खुसी लागेको उनले उल्लेख गरिन्।
विद्यालय तथा अन्य संस्थाले सञ्चालन खर्च घटाउँदै वातावरणीय जिम्मेवारी पूरा गर्न खोजिरहेका बेला विद्युतीय सवारीसाधन व्यावहारिक विकल्पका रूपमा विस्तार हुँदै गएको कम्पनीको भनाइ छ।
दिगोले व्यावसायिक प्रयोजनका विद्युतीय सवारीसाधन, चार्जिङ पूर्वाधार, भाडामा सवारी उपलब्ध गराउने सेवा, प्रविधिमा आधारित यातायात सेवा तथा बिक्रीपछिको मर्मतसम्भार र सहयोगमार्फत नेपालमा विद्युतीय सवारीसाधनसम्बन्धी सेवा विस्तार गर्दै आएको छ।
उलन्स स्कुलको यातायात समूहमा ४० वटा विद्युतीय भ्यान थपिनुले विद्यालयको यातायात सेवालाई स्वच्छ र दिगो बनाउने प्रयासमा सहयोग पुग्ने अपेक्षा गरिएको छ।
