इटहरी । रामाडा बाइ विन्डह्याम इटहरीले पूर्वी नेपालका पर्यटकीय गन्तव्यको प्रवर्द्धनलाई प्राथमिकता दिँदै यस क्षेत्रलाई पर्यटनको केन्द्रका रूपमा विकास गर्न पहल गरिरहेको छ। अन्तर्राष्ट्रिय होटल ब्रान्ड विन्डह्याम होटल्स एन्ड रिसोर्ट्सअन्तर्गतको रामाडा इटहरी सन् २०२६ जनवरीदेखि सञ्चालनमा आएको हो ।
होटल सञ्चालनमा आउनुअघि नै सामाजिक सञ्जालमार्फत पूर्वी नेपालका विभिन्न पर्यटकीय गन्तव्यको प्रचारप्रसार गर्दै आएको होटलले प्राकृतिक सौन्दर्य, वन्यजन्तु, सांस्कृतिक सम्पदा र यात्राका अनुभवलाई पर्यटकमाझ चिनाउने प्रयास गरिरहेको छ ।
होटललाई औपचारिक रूपमा साँचो हस्तान्तरण गर्ने कार्यक्रम गत मार्चमा सम्पन्न भएको थियो । उक्त अवसरमा विन्डह्याम होटल्स एन्ड रिसोर्ट्सका युरेसिया क्षेत्रका सञ्चालन प्रमुख अनिमेश कुमारले होटलको भ्रमण गरी साँचो हस्तान्तरण गरेका थिए । कार्यक्रममा होटलका अध्यक्ष देशबन्धु बस्नेतसहित टोलीको उपस्थिति थियो ।
रामाडाले पूर्वी नेपालमा आवास तथा खानपानको सेवा उपलब्ध गराउनुका साथै यस क्षेत्रका पर्यटकीय स्थलको प्रचारप्रसारलाई पनि आफ्नो योजनाको हिस्सा बनाएको छ । पूर्वी नेपाल पुग्ने पर्यटकलाई होटलमा बस्न मात्रै नभई आसपासका गन्तव्यको भ्रमण गर्नसमेत प्रोत्साहित गर्ने उद्देश्य रहेको होटलले जनाएको छ ।
होटलले प्रवर्द्धन गर्दै आएका प्रमुख गन्तव्यमध्ये कोशीटप्पु वन्यजन्तु आरक्ष पनि एक हो । जैविक विविधता र विभिन्न प्रजातिका चराचुरुङ्गीका लागि परिचित आरक्षको महत्त्वबारे जानकारी गराउन होटलले आरक्षका संरक्षण अधिकृत भूपेन्द्र यादवसँग सहकार्य गर्दै आएको छ ।
यसै क्रममा होटलले ‘कोशीटप्पु वाइल्डरनेस एस्केप’ प्याकेजसमेत सञ्चालनमा ल्याएको छ । उक्त प्याकेजमार्फत पाहुनालाई पूर्वी नेपालको प्राकृतिक सम्पदा नजिकबाट अनुभव गर्ने अवसर उपलब्ध गराउने लक्ष्य राखिएको छ ।
पूर्वी नेपालमा वन्यजन्तु तथा चरा अवलोकन, सांस्कृतिक सम्पदा र प्राकृतिक दृश्यावलोकनका विविध सम्भावना छन् । होटलले सामाजिक सञ्जाल तथा अन्य सञ्चार माध्यमबाट यस्ता गन्तव्यको प्रचारप्रसार गर्दै प्रचलित पर्यटकीय मार्गभन्दा बाहिरका स्थानसमेत घुम्न पर्यटकलाई प्रोत्साहित गरिरहेको छ ।
गन्तव्य प्रवर्द्धनसँगै रामाडाले आफ्नो रेस्टुरेन्ट तथा खानपान सेवामार्फत पनि ग्राहक आकर्षित गरिरहेको छ । होटलका अनुसार यसका खानपान सेवाले होटलमा बस्ने पाहुनाका साथै स्थानीय ग्राहकलाई समेत आकर्षित गर्दै आएको छ । यसले होटललाई आवासको सुविधामा सीमित नराखी खानपान र समय बिताउने गन्तव्यका रूपमा समेत स्थापित गर्न सहयोग पुर्याएको छ ।
होटल सञ्चालनमा आउनुअघि सुरु भएको गन्तव्य प्रवर्द्धन अभियानलाई निरन्तरता दिँदै रामाडाले पूर्वी नेपालको पर्यटन विकासमा योगदान पुर्याउने लक्ष्य राखेको छ । गन्तव्यको प्रचारप्रसार, स्थानीय सरोकारवालासँगको सहकार्य र आतिथ्य सेवामार्फत होटलले पर्यटकलाई बसोबास र भ्रमणका अनुभवबीच जोड्ने प्रयास गरिरहेको छ ।
रामाडाका लागि यो पहल होटल सञ्चालनमा सीमित नभई पूर्वी नेपालका पर्यटकीय आकर्षणलाई राष्ट्रिय तथा अन्तर्राष्ट्रिय पर्यटकमाझ चिनाउने प्रयाससमेत हो ।
