काठमाडौं। राष्ट्रिय स्वतन्त्र पार्टी (रास्वपा) कुलिङ अफ पिरियडको व्यवस्था माथि भएको चलखेलमा राज्य व्यवस्था तथा सुशासन समितिका सभापति रामहरि खतिवडा जिम्मेवार रहेको भन्दै उनको राजिनामा माग गरेको छ । रास्वपाले संसदीय समितिको प्रतिवेदन अनुसार समिति सभापति खतिवडाले राजीनामा दिनुपर्ने माग गरेको हो ।
रास्वपाका प्रवक्ता मनिष झाले पार्टीको सचिवालय बैठकले खतिवडाको राजिनामा माग बारे निर्णय गरेको जानकारी दिए । उनले खतिवडा पदमा बसिराख्न नैतिकता गुमाएकाले राजीनामा दिनुपर्ने बताए ।
कुलिङ अफ पिरियडको व्यवस्था माथि भएको चलखेलमा संसदीय समितिको प्रतिवेदन अनुसार समिति सभापति खतिवडाले राजीनामा दिनुपर्ने उनको भनाइ छ ।
समितिको प्रतिवेदन अनुसार समितिका सभापति दोषी भएको रास्वपाको ठहर छ । समितिको सभापति पदबाट राजीनामा दिई खतिवडाले नैतिकता देखाउनुपर्ने उनले बताए । गलत काम गरेर नालायकी देखाएर पदमा बस्न नहुने उनको तर्क छ ।
कांग्रेस सहमहामन्त्री जीवन परियारको संयोजकत्वमा बनेको कुलिङ अफ पिरियडमा भएको गडबढी छानबिन समितिले मंगलबार कुलिङ अफ पिरियड समिति सभापति खतिवडा समेत जिम्मेवार रहेको प्रतिवेदन संसदमा पेश गरेको छ ।
