काठमाडौं, १६ साउन । कुनै समय तत्कालिन प्रधानन्यायाधीश गोपाल पराजुलीलाई पदमूक्त भएको पत्र काटेर चर्चामा आएका पात्र हुन् नृपध्वज निरौला । न्याय परिषदका तत्कालिन सचिव निरौला हाल सर्वोच्च अदालतको मुख्य रजिष्टारमा बढुवा भएका छन् । मुख्य रजिष्टारमा बढुवा भएसँगै उनको रवाफ बढ्न थालेको छ । निजामति कर्मचारीको मुख्य सचिव सरह सेवा सुविधा हुनुपर्ने निरौलाले सर्वोच्च अदालतको गाडीहरु आफूखुसी दुरुपयोग गरेको पाइएको छ ।
करोडौँ मुल्य पर्ने ३ वटा गाडी निरौलाले दुरुपयोग गर्ने गरेको पाइएको हाे ।
सर्वोच्च अदालत स्रोतका अनुसार निरौलाले डेढ करोड रुपैयाँ भन्दा बढी मुल्य पर्ने बा २ झ ३३१६ नम्बरको टोयोटा फोर्चुनर गाडी चढ्ने गरेका छन् । त्यस्तै अर्को करिब पौने करोड हाराहारी मुल्य पर्ने बा २ झ ८०२ नम्बरको हुन्डाई टक्सन गाडी पनि निरौलाले नै चढ्दै आएका छन् । त्यति मात्रै होइन सरकारी गाडीलाई नीजि नम्बर बनाएर दुरुपयोग गर्ने गरेको समेत खुलाशा भएको छ ।
बा २ च ९८५१ नम्बरको रातो कारमा भने निजी नम्बर राखेर निरौलाको श्रीमतीलाई आवत जावत गराउने गरेको खुलाशा भएको छ ।
निरौलाले २ जना सरकारी ड्राइभर समेत प्रयोग गरिरहेका छन । एकजना आफूले प्रयोग गर्ने, अर्का एक जनालाई घरयासी काम गर्न र घरमा लगिएको गाडि चलाउने काममा प्रयोग गरिएको छ । घरमा काम गर्नका लागि युवराज खतिवडालाई राखिएको थियो तर उनले घरको काम गर्न नमानेपछि गत साउन १ गतेदेखि विदुर आचार्यलाई पठाइएको छ । खतिवडाले भने गाडी चलाउने गरेका छन् ।
घरमा गृहिणीको रुपमा रहेकी निरौलाकी श्रीमतीलाई फोर्ड कम्पनिको बा १ झ ९१५७ नम्बरको सरकारी गाडीलाई निजी बनाएर चलाइएको छ । यस विषयमा निरौलाको मोबाइल नम्बरमा सम्पर्क गर्दा उनले फोन उठाएनन् ।
त्यस्तै भक्तपुर जिल्ला अदालतको श्रेष्तेदारले सरकारी गाडिलाई रातो प्लेट (प्राइभेट) बनाई दुरूपयोग गरेका छन् । श्रेष्तेदार घनेन्द्र अधिकारीले सरकारी नं. प्लेटको गाडिलाई बा ५ च ९६४५ नम्बर वनाई चढेर हिँड्ने गरेका छन् ।
यता बैदेशिक रोजगार न्यायाधीकरणले सेतो सरकारी प्लेटमा परिवर्तन नगरी गाडि खरिद गर्दाको अवस्थामै टासिएको नक्कली रातोप्लेट नै राखेर अफिसियल प्रयोजनका लागि प्रयोग गर्दै आएको छ । बा १८ च ७५९४ नम्बरको गाडी दुरुपयोग हुँदै आएको छ ।
श्रम अदालतमा भने अर्कै काण्डले चर्चा पाइरहेको छ ।
श्रम अदालतले नयाँ गाडी खरिद गरेपछि सेतो नम्बर प्लेट बनाएर दर्ता गर्न पठाएको थियो । बीच बाटोमै तत्कालिन स्टोर किपरले पत्र सच्याई रातो प्लेटमै दर्ता गराइएको थियो । २०७१ साल देखिनै दुरुपयोग हुँदै आएको सो गाडि श्रम अदालतका हालका श्रेष्तेदार जीवन भण्डारीले उक्त गाडी दुरुपयोग गर्दै आएका छन् । दुरुपयोग गर्दै आएको यो गाडिको अहिलेसम्म कर पनि तिरिएको छैन । सरकारी नं। प्लेटमा हुँदा ७००० रुपैयाँ मात्रै कर बुझाउनु पर्ने थियो । तर प्राइभेट नम्बरमा हुँदा वार्षिक २२ हजार कर तिर्नुपर्ने बताइएको छ । कर नतिरेका कारण बा ११ च ५९६३ नम्बरको उक्त गाडी हालसम्म नविकरण समेत भएको छैन ।