नेकपा माओवादी केन्द्रका संयोजक पुष्पकमल दाहाल ‘प्रचण्ड’ ले इतिहासकै ठुलो वैदेशिक दबाब र हस्तक्षेपको महसुस गरिरहेको बताएका छन् ।
काठमाडौंमा सम्पादकहरूसँगको संवादमा प्रचण्डले अहिले देश अप्ठ्यारो अवस्थामा रहेको बताए ।
उनले भने, ‘सबै राजनीतिक दल नागरिक समाज, प्रेस जगत् सबै हिजो राजनीतिक परिवर्तनको निम्ति एक भएर आवाज उठाएका थियौँ । त्यसबाट संविधान सभा हुँदै संघीय लोकतान्त्रिक गणतन्त्रको नयाँ प्रक्रियामा हामी आएका थियौँ ।’
उनले आज फेरि गम्भीर विचार विमर्शसहित देशको राष्ट्रियता, स्वाधीनता र स्वतन्त्रताको रक्षाको लागि एक हुनुपर्ने आवश्यकता उत्पन्न भएको बताए । विगतको समीक्षा र आगामी बाटोको विषयमा बहस र छलफल गरेर साझा निष्कर्ष निकाल्नुपर्नेमा प्रचण्डको जोड थियो ।
