काठमाडौँ । हालै मधेस प्रदेशमा राजनीतिक उतारचढावबीच जनमत पार्टी विभाजित भएको पुष्टि भएको छ। पूर्वमुख्यमन्त्री सतिश कुमार सिंहले जनमत पार्टी त्यागेर जनस्वराज पार्टीमा आधिकारिक रूपमा प्रवेश गरेका छन्।
पूर्वमुख्यमन्त्री लालबाबु राउत नेतृत्वको जनमत पार्टीभित्र लामो समयदेखि देखिँदै आएको असन्तुष्टि र मतभेद पछि पार्टी फुटेको हो।
सिंह निकट नेताहरूको भनाइअनुसार, पार्टी नेतृत्वले आन्तरिक लोकतन्त्रको अवहेला गरेको र मधेसको वास्तविक मुद्दा छायाँमा पारिएको कारण पार्टी फुटको संघारमा पुगेको थियो ।
सिंहले जनस्वराज पार्टीमा प्रवेशपछि भने, ‘मधेसको पहिचान, सम्मान र स्वाभिमानका लागि जनस्वराज पार्टी नै अहिलेको विकल्प हो। हामी नीति र विचारका आधारमा अघि बढ्नेछौं,’ उनले नयाँ यात्राको सुरुवात भएको घोषणा गरे।
जनस्वराज पार्टीले सिंहको प्रवेशलाई स्वागत गर्दै उनलाई केन्द्रीय समितिको वरिष्ठ भूमिकामा जिम्मेवारी दिने तयारी गरेको जनाएको छ।
यस घटनासँगै मधेसको राजनीतिमा नयाँ समीकरण बन्न थालेको विश्लेषकहरूको भनाई छ। जनमत पार्टीभित्र अझै केही नेताहरू पनि सिंहको समर्थनमा रहेको र निकट भविष्यमै थप विभाजन हुन सक्ने संकेत गरिएको छ।
यो कदमले मधेसको राजनीतिमा ठूलो प्रभाव पार्ने राजनीतिक विश्लेषकहरूको भनाई छ । यससँगै मधेस प्रदेशको आगामी राजनीतिक समीकरण फेरि एकपटक नयाँ दिशातर्फ मोडिएको देखिएको छ।
