काठमाडौं । नेपाली कम्युनिस्ट पार्टी (नेकपा)का नेता तथा पूर्वमन्त्री उमेश प्रसाद यादव जनता समाजवादी पार्टी, नेपाल (जसपा)मा प्रवेश गरेका छन्। मंगलबार काठमाडौंमा आयोजित एक कार्यक्रममा उनले औपचारिक रूपमा जसपा नेपालमा प्रवेश गरेका हुन्।
यादवलाई जसपा नेपालका अध्यक्ष उपेन्द्र यादव लगायत शीर्ष नेताहरूले पार्टीमा स्वागत गरेका थिए। कार्यक्रममा बोल्दै अध्यक्ष यादवले मधेश आन्दोलन, संघीयता र समावेशी लोकतन्त्रको एजेन्डामा साझा प्रतिबद्धता भएकाहरूलाई पार्टीमा स्वागत गरिएको बताए।
पूर्वमन्त्री यादवले मुलुकको वर्तमान राजनीतिक अवस्थालाई मध्यनजर गर्दै मधेश र सीमान्तकृत समुदायको हकहितका लागि जसपा नेपाल उपयुक्त राजनीतिक मञ्च भएको बताए। उनले भने, “संघीयता, पहिचान र सामाजिक न्यायको मुद्दालाई बलियो रूपमा उठाउन जसपा नेपालसँगै अघि बढ्ने निर्णय गरेको हुँ।”
सप्तरी जिल्लाका स्थायी बासिन्दा उमेश प्रसाद यादव २०७० सालको दोस्रो संविधानसभा निर्वाचनमा सप्तरी-३ बाट निर्वाचित सांसद बनेका थिए। उनी तत्कालीन नेकपा (माओवादी केन्द्र) बाट निर्वाचित भई प्रचण्ड नेतृत्वको सरकारमा सिंचाइ मन्त्री समेत भएका थिए।
२०७४ सालको प्रतिनिधिसभा निर्वाचनमा भने उनी जसपा नेपालका अध्यक्ष उपेन्द्र यादवसँग पराजित भएका थिए। त्यसपछि सक्रिय राजनीतिमा रहे पनि पछिल्लो समय पार्टीगत गतिविधिमा उनी कम देखिँदै आएका थिए।
उमेश यादवको जसपा नेपाल प्रवेशलाई मधेश केन्द्रित राजनीतिमा नयाँ समीकरणको रूपमा हेरिएको छ।
