काठमाडौं । नेकपा एमालेले आगामी राष्ट्रिय सभा निर्वाचनका लागि ६ जनालाई उम्मेद्वार बनाउने निर्णय गरेको छ । एमालेले नेतृ रोशनी मेचे, सम्झना देवकोटा, रामकुमारी झाँक्री, मिना रखाल, लीला भण्डारी र प्रेम दंगाललाई उम्मेदवार बनाउने निर्णय गरेको हो ।
विभिन्न क्लस्टर र क्षेत्रीय सन्तुलनलाई ध्यानमा राख्दै केन्द्रीय कमिटीको परामर्शमा उम्मेदवार टुंग्याइएको पार्टी स्रोतले जानकारी दियो ।
रोशनी मेचे एमालेकी आदिवासी जनजाति समुदायबाट आएकी नेतृ हुन्। उनी पार्टीको केन्द्रीय राजनीतिमा लामो समयदेखि सक्रिय रहँदै आएकी छन् ।
प्रेम दंगाल एमालेका केन्द्रीय तहका नेता हुन्। उनी किसान आन्दोलनबाट उदाएका नेता मानिन्छन् र पार्टी निकट किसान संगठनको नेतृत्वमा रहेर काम गरिसकेका छन्। कृषकका मुद्दा उठाउँदै आएका दंगाल संगठनात्मक क्षमताका लागि परिचित छन्।
सम्झना देवकोटा पार्टीभित्र महिला तथा बौद्धिक वर्गको प्रतिनिधित्व गर्ने नेतृका रूपमा परिचित छन्। उनी एमालेको संगठनात्मक संरचनामा विभिन्न जिम्मेवारी सम्हाल्दै आएकी छन्।
त्यस्तै, भर्खरै सम्पन्न एमालेको ११ औँ महाधिवेशन पछि केन्द्रीय सदस्यमा निर्वाचित भएकी रामकुमारी झाँक्री पूर्वमन्त्रीसमेत हुन् । उनी राष्ट्रिय राजनीतिमा स्पष्ट धारणा राख्ने नेतृका रूपमा चिनिन्छिन्।
मिना रखाल पार्टीको महिला संगठन तथा स्थानीय तहको राजनीतिमा सक्रिय नेतृ हुन्। उनले लामो समयदेखि संगठन निर्माण र सामाजिक अभियानमा काम गर्दै आएकी छन्।
त्यसैगरी लीला भण्डारी एमालेकी महिला नेतृ हुन्। उनी पार्टीको महिला तथा समावेशी संरचनामा सक्रिय रहँदै आएकी छन् र संगठनात्मक योगदान पुर्याउँदै आएकी छन्।
एमालेले राष्ट्रिय सभामा अनुभवी, समावेशी र संगठनात्मक रूपमा योगदान दिएका नेताहरूलाई उम्मेदवार बनाएको जनाएको छ।
