काठमाडौँ । नेपाली कांग्रेसबाट लुम्बिनी प्रदेशका राष्ट्रियसभा सदस्य पदका लागि अपाङ्गता कोटा अन्तर्गत उम्मेदवारी दिएका वासुदेव घिमिरे ‘जंगली’ विरुद्ध उजुरी दर्ता भएको छ। घिमिरेले अपाङ्गता कोटाबाट उम्मेदवारी दिएपछि प्रदेश निर्वाचन कार्यालय घोराही, दाङ मा बिहीबार उजुरी परेको हो।
प्रदेश निर्वाचन कार्यालयका सूचना अधिकारी गेहेन्द्र कुँवरले घिमिरेको उम्मेदवारीविरुद्ध उजुरी दर्ता भएको जानकारी दिए।
उजुरीमा घिमिरे अपाङ्गता कोटाका लागि आवश्यक योग्यता नपुगेको दाबी गरिएको छ। अपाङ्गता नभएको व्यक्तिले उक्त कोटाबाट उम्मेदवारी दिएको भन्दै उम्मेदवारी खारेज गर्न माग गरिएको निर्वाचन कार्यालयले जनाएको छ।
घिमिरेलाई नेपाली कांग्रेस–एमाले गठबन्धनले लुम्बिनी प्रदेशबाट राष्ट्रियसभा सदस्यको उम्मेदवार बनाएको थियो। गठबन्धनका तर्फबाट अन्य कोटामा समेत उम्मेदवारी दर्ता भएका छन्।
निर्वाचन आयोगको कार्यतालिका अनुसार घिमिरेविरुद्ध परेको उजुरीमाथि जाँच–बुझ प्रक्रिया अघि बढाइनेछ। उजुरीको छानबिनपछि आयोगले आवश्यक निर्णय गर्ने निर्वाचन कार्यालयले जनाएको छ।
राष्ट्रियसभा सदस्य निर्वाचनका लागि विभिन्न प्रदेशमा उम्मेदवारी दर्ता तथा उजुरी प्रक्रियासँगै राजनीतिक गतिविधि बढेको छ। अपाङ्गता कोटा संविधानद्वारा सुनिश्चित समावेशी प्रतिनिधित्वको व्यवस्था भएकाले यसमा उम्मेदवारको योग्यता विषय संवेदनशील मानिन्छ।
घिमिरेको उम्मेद्वारीबारे परेको उजुरीको निर्णय निर्वाचन आयोगले सार्वजनिक गरेपछि मात्रै उनको उम्मेदवारी कायम रहने वा खारेज हुने विषय टुंगो लाग्नेछ।
