काठमाडौँ। बुल्गेरियामा श्रम भिसामा पठाइदिने प्रलोभन देखाएर करोडौं रुपैयाँ ठगी गरेको आरोपमा काठमाडौँस्थित ‘कोज्मो एजुकेसन कन्सल्टेन्सी’का सञ्चालक बिरुद्ध मुद्दा दायर गरिएको छ । पीडितको निवेदनका आधारमा सर्लाहीका ५५ वर्षीय लालबाबु रामविरुद्ध वैदेशिक रोजगार न्यायाधिकरणमा मुद्दा दायर गरिएको हो ।
रामविरुद्ध २ करोड ८४ लाख रुपैयाँ बिगो दाबी गरिएको छ । प्रहरीका अनुसार रामविरुद्ध हालसम्म २५ वटा मुद्दा दर्ता भइसकेका छन्। तर, उनी भने पुस १९ गतेदेखि फरार रहेका छन्।
वैदेशिक रोजगार विभागले कन्सल्टेन्सीमा कार्यरत टीकापुरकी २१ वर्षीया हिमा नायक र इलामकी २२ वर्षीया आस्था खड्कालाई तारेखमा रिहा गरिएको जनाएको छ।
पीडितहरूका अनुसार कन्सल्टेन्सीले भारतको राजधानी दिल्ली हुँदै बुल्गेरिया पठाइदिने भन्दै करिब तीन सय जनाबाट रकम असुलेको थियो। प्रतिव्यक्ति २ लाख ५० हजार रुपैयाँका दरले रकम उठाइएको बताइएको छ।
