काठमाडौँ । नेपाल कम्युनिष्ट पार्टी (एमाले)ले आगामी निर्वाचनलाई लक्षित गर्दै आफ्नो चुनावी घोषणा पत्र सार्वजनिक गरेको छ। बिहीबार राजधानीमा आयोजित एक कार्यक्रममा एमाले अध्यक्ष केपी शर्मा ओलीले घोषणापत्र सार्वजनिक गरेका हुन् ।
एमालले घोषणा पत्रमार्फत ‘समृद्ध नेपाल, सुखी नेपाली’को दीर्घकालीन राष्ट्रिय आकांक्षालाई आधार बनाउँदै आर्थिक पुनरुत्थान, सुशासन, पूर्वाधार विकास र सामाजिक न्यायलाई मुख्य एजेण्डाका रूपमा अघि सारेको छ।
घोषणा पत्र सार्वजनिक कार्यक्रममा पार्टी नेतृत्वले उत्पादनमुखी अर्थतन्त्र निर्माण र स्वदेशमै रोजगारी सिर्जना प्रमुख प्राथमिकता भएको जनाएको छ।
औद्योगिकीकरण प्रवर्द्धन, कृषि आधुनिकीकरण, युवा उद्यमशीलता विकास तथा सहुलियतपूर्ण ऋण व्यवस्थामार्फत आन्तरिक रोजगार वृद्धि गर्ने योजना दस्तावेजमा समेटिएको छ। वैदेशिक रोजगारीबाट फर्किएका श्रमिकको पुनःएकीकरणका लागि विशेष कार्यक्रम सञ्चालन गर्ने उल्लेख पनि गरिएको छ।
पूर्वाधार विकासतर्फ राष्ट्रिय गौरवका आयोजनालाई तीव्रता दिने प्रतिबद्धता जनाइएको छ। सडक, द्रुतमार्ग, सुरुङमार्ग, रेलमार्ग तथा जलविद्युत् आयोजना विस्तारलाई उच्च प्राथमिकता दिइएको छ। साथै डिजिटल पूर्वाधार सुदृढ गरी सेवा प्रवाहलाई प्रविधिमैत्री बनाउने योजना घोषणा पत्रमा समावेश छ।
कृषि क्षेत्रलाई आत्मनिर्भर अर्थतन्त्रको आधारका रूपमा व्याख्या गर्दै सिँचाइ विस्तार, मल-बीउको सहज आपूर्ति, न्यूनतम समर्थन मूल्य सुनिश्चितता र कृषि बीमा कार्यक्रम सुदृढ गर्ने लक्ष्य राखिएको छ। ग्रामीण क्षेत्रमा सहकारी तथा साना-मझौला उद्योग प्रवर्द्धनलाई पनि प्राथमिकता दिइएको छ।
शिक्षातर्फ सार्वजनिक शिक्षाको गुणस्तर अभिवृद्धि, प्राविधिक तथा व्यावसायिक शिक्षामा जोड र उच्च शिक्षामा अनुसन्धान प्रवर्द्धन गर्ने नीति लिइएको छ। स्वास्थ्य क्षेत्रमा आधारभूत सेवा सर्वसुलभ बनाउने, प्रदेशस्तरीय विशिष्ट अस्पताल सुदृढ गर्ने तथा स्वास्थ्य बीमा प्रणाली सुधार गर्ने प्रतिबद्धता उल्लेख गरिएको छ।
सुशासन र भ्रष्टाचार नियन्त्रणलाई पनि घोषणा पत्रको मुख्य आधार बनाइएको छ। पारदर्शिता, उत्तरदायित्व र सेवा प्रवाहमा डिजिटलीकरणमार्फत प्रशासनिक सुधार गर्ने तथा भ्रष्टाचारविरुद्ध कडा कानुनी कार्यान्वयन गर्ने प्रतिबद्धता जनाइएको छ।
सामाजिक न्यायअन्तर्गत महिला, दलित, आदिवासी-जनजाति, मधेसी, अपाङ्गता भएका व्यक्ति तथा पिछडिएका वर्गका लागि लक्षित कार्यक्रम ल्याउने घोषणा गरिएको छ। सामाजिक सुरक्षा भत्ता विस्तार र श्रमिक अधिकार संरक्षणमा जोड दिइएको छ।
विदेश नीतिमा राष्ट्रिय हितलाई केन्द्रमा राख्दै सन्तुलित र स्वतन्त्र कूटनीति अवलम्बन गर्ने नीति अघि सारिएको छ। छिमेकी राष्ट्रसँग पारस्परिक हितमा आधारित सहकार्य विस्तार गर्ने उल्लेख गरिएको छ।
पार्टीले घोषणा पत्रमार्फत स्थायित्व, विकास र समृद्धिको स्पष्ट मार्गचित्र प्रस्तुत गरेको दाबी गरेको छ। आगामी निर्वाचनमा मतदाताको समर्थन प्राप्त गरी कार्यक्रम कार्यान्वयन गर्ने प्रतिबद्धता व्यक्त गरिएको छ।
