काठमाडौँ । प्रतिनिधिसभा सदस्य निर्वाचनअन्तर्गत १०० वर्षभन्दा माथि उमेरका ज्येष्ठ नागरिकले पनि मतदान गरेर लोकतन्त्रमा सक्रिय सहभागिता देखाएका छन्।
झापाको मेचीनगर नगरपालिका-१० स्थित धुलाबारी माध्यमिक विद्यालयको मतदान केन्द्रबाट १०४ वर्षीया बृद्धा तुलसा कोइरालाले मतदान गरिन्।
त्यसैगरी, तनहुँको शुक्लागण्डकी नगरपालिका-३ बन्केवा निवासी १०७ वर्षीय गणेशबहादुर रावतले निर्माण आधारभूत प्राथमिक विद्यालय, बन्केवा मतदान केन्द्रबाट आफ्नो मताधिकार प्रयोग गरे। मतदानपछि उनले आफ्नो मत प्रयोग गर्न पाउँदा खुशी लागेको बताए।
काठमाडौँको बूढानीलकण्ठ नगरपालिका-२ चपली मतदान केन्द्रमा पहिलो मतदाताका रुपमा १०५ वर्षीय चन्द्रबहादुर खड्काले मतदान गरे। उनले यो उमेरमा पनि मतदान गर्न पाउँदा खुसी लागेको बताए ।
यी ज्येष्ठ नागरिकहरूको मतदानले लोकतन्त्रको जगेर्ना र नागरिक जिम्मेवारीप्रति उदाहरण प्रस्तुत गरेको छ।
