
जिउँदै इटाभट्टामा जलाएर व्यक्तिको हत्या गरेको अभियोग लागेका पूर्व मन्त्री एवं कांग्रेस नेता मोहम्मद अफताब आलमलाई जन्मकैदको फैसला भएको छ ।
१६ वर्षपछि रौतहटमा गरेको जघन्य अपराधमा संलग्न भएकोमा आलमसहितका ४ जनाविरुद्ध बिहीबार जिल्ला अदालत रौतहटले जन्मकैदको फैसला गरेको हो । चार वर्षदेखि विचाराधीन मुद्दामा अदालतले आलमसँगै महताब आलम, शेष सेराज र बद्री सहनीलाई पनि जन्मकैदको फैसला सुनाएका छ ।
यसरी फैसला सुनाइएकोमा महताब आफताबका आफ्नै भाइ हुन् । सेराज र बद्री उनका सहयोगी हुन् ।
रौतहट जिल्ला अदालतका न्यायाधीश मातृकाप्रसाद आचार्यको एकल इजलासले यस्तो फैसला सुनाएको हो ।
मुक्ति साहले सफाइ पाउँदा मोहम्मद मोबिन, शेष फजलेहक, शेष भदई, सागिर आलम, गौरीशंकर साह र शेष मालाकारको मुद्दा मुल्तबीमा राखिएको छ ।
आलम पुर्पक्षका लागि ललितपुरस्थित नक्खुको कारागारमा छन् ।
आलम पटकपटक मन्त्री र कांग्रेसबाट सांसद भइसकेका छन् । आलम ०५१, ०५६, ०६४ र ०७४ मा प्रतिनिधिसभा सांसद बनेका थिए ।
२०६४ सालको चैत २८ गते हुने संधिानसभाको निर्वाचन अगाडि २७ चैतमा मतदातालाई प्रभावित बनाउन र तर्साउन बम बनाउने क्रममा विष्फोट हुँदा उनीहरु घाइते भएका थिए ।
घाइते र प्रत्यक्षदर्शीलाई समेत विभत्स तरिकाले मारेर घटना लुकाउन इटा भट्टामा हालेर जिँउँदै जलाइएको थियो ।