फरार दुर्गा प्रसाईंको अर्को भिडिओ :मेरो जीवनको रक्षा हुन्छ भने २४ घण्टाभित्र उपस्थित हुन्छु
काठमाडौं । चैत १५ गतेको हिंसात्मक राजावादी प्रदर्शनपछि फरार रहेका दुर्गा प्रसाईंले आफू नभागेको दाबी गरेका छन्। उनले भनेका छन्, ‘म भागेको होइन। पहिला दुईवटा केस त म भागिन। यसमा म जोगिएको हो।’
फरार रहेका दुर्गा प्रसाईंले आफ्नो जीवनको रक्षाको सुनिश्चित भए २४ घण्टाभित्र प्रहरी समक्ष उपस्थित हुने बताएका छन्।
बुधबार सामाजिक सञ्जाल फेसबुकमा एक भिडियो अपलोड गर्दै प्रसाईंले आफ्नो जीवनको रक्षाको सुनिश्चित भए २४ घण्टाभित्र प्रहरी समक्ष उपस्थित हुने बताएका हुन्।
उनले भनेका छन्, ‘मेरा वकिलहरू धुव्रलाल श्रेष्ठ, स्वागत नेपाल, टंक दुलाल, सुशील पन्त, डा सुरेन्द्र भण्डारी, रमन श्रेष्ठ, डा भिमार्जुन आचार्य र मानव अधिकारको रोहबरमा हो भने म भोली २४ घण्टाभित्र पुलिस प्रशासनमा उपस्थित हुन्छु। मलाई खोज्नु पर्दैन। भारत भागेको भनिएको छ। म कतै भागेको छैन। नेपालमै छु नेपालकै कुनै ठाउँमा बसिरहेको छु। मेरो जीवनको रक्षाको सुनिश्चित हुन्छ भने म बाहिर आउन तयार छु।’
उनले पेरुका गोञ्जालोको उदाहरण दिँदै आफै नरहे राजावादी आन्दोलन सेलाएर जाने दाबी पनि गरेका छन्।
