काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री केपी ओलीले आन्दोलनरत शिक्षकहरूलाई अपमानित गरेको आरोप लगाएका छन् । प्रेस सेन्टर नेपालका नवनिर्वाचित पदाधिकारीसहितका सदस्यको शपथग्रहण तथा पद हस्तान्तरण कार्यक्रमलाई सम्बोधन गर्दै नेता प्रचण्डले सो आरोप लगाएका हुन् ।
वर्तमान प्रधानमन्त्री केपी शर्मा ओलीप्रति लक्षित गर्दै नेता प्रचण्डले ओली सरकार बाहिर हुँदा शिक्षकहरूलाई आन्दोलन गर्न उक्साएको स्मरण गरे । उनले भने, हिजो प्रतिपक्षमा हुँदा शिक्षकहरूलाई आन्दोलन किन नगरेको भन्दै उक्साउने मान्छे अहिले प्रधानमन्त्रीको कुर्सीमा हुनुहुन्छ । अहिले शिक्षकहरू आन्दोलनमा छन्, शिक्षकहरूलाई अपमानित गर्ने काम तिनै प्रधानमन्त्रीबाट भइरहेको छ ।’
प्रचण्डले आफू प्रधानमन्त्री हुँदा शिक्षकहरूको माग सम्बोधन गर्न सहमति गरेको स्मरण गरे । उनले शिक्षक, सहकारी र लघुवित्त पीडितहरूको जायज माग सम्बोधन गर्ने पहल गरेको बताए । प्रचण्डले ओली सरकार लाज पचाएर शिक्षकहरूलाई अपमानित गर्नतिर लागेको आरोप लगाए ।
उनले छोटो बाटोबाट शिक्षकहरूसँग विगतमा भएका सहमतिअनुसार ऐन दिएर कक्षाकोठामा फर्काउनुपर्ने बताए ।
