- ट्रेण्डिङ :
काठमाडौँ । स्पेनले साविक विजेता अर्जेन्टिनालाई अतिरिक्त समयमा १-० गोलले पराजित गर्दै फिफा विश्वकप फुटबल-२०२६ को उपाधि जितेको छ। अमेरिकाको न्यु जर्सीस्थित न्यूयोर्क-न्यु जर्सी स्टेडियम (मेटलाइफ स्टेडियम) मा सोमबार सम्पन्न रोमाञ्चक फाइनलमा फेरान टोरेसले अतिरिक्त समयको १०६औँ मिनेटमा गरेको निर्णायक गोल नै स्पेनलाई विश्वविजेता बनाउन पर्याप्त बन्यो।
निर्धारित ९० मिनेटसम्म दुवै टोली गोलरहित बराबरीमा रोकिएपछि खेल अतिरिक्त समयमा धकेलिएको थियो। अतिरिक्त समयमा अर्जेन्टिनाका एन्जो फर्नान्डेज रातो कार्ड पाएर मैदानबाट बाहिरिएपछि स्पेनले त्यसको फाइदा उठायो। केहीबेरमै फेरान टोरेसले रिबाउन्ड बललाई जाली चुमाउँदै स्पेनलाई ऐतिहासिक जित दिलाए।
योसँगै स्पेनले सन् २०१० पछि पहिलोपटक तथा समग्रमा दोस्रो विश्वकप उपाधि जितेको हो। १६ वर्षपछि विश्व फुटबलको सर्वोच्च उपाधि पुनः जित्दै स्पेनले आफ्नो स्वर्णिम युगलाई पुनर्जीवित गरेको छ। प्रतियोगिताभर उत्कृष्ट प्रदर्शन गरेको स्पेनले आठ खेलमा केवल एक गोल मात्र बेहोरेर विश्वकप इतिहासमै सबैभन्दा उत्कृष्ट रक्षात्मक प्रदर्शन गर्ने च्याम्पियन टोलीमध्ये एक बन्न सफल भएको छ।
यता, लगातार दोस्रो विश्वकप उपाधिको खोजीमा रहेको अर्जेन्टिनाको सपना अधुरै रह्यो। कप्तान लियोनेल मेस्सीको सम्भावित अन्तिम विश्वकप यात्रा उपविजेतामै सीमित भयो। खेलपछि मेस्सी भावुक बनेका दृश्यहरूले विश्वभरका फुटबल समर्थकलाई भावुक बनाएको थियो।
विश्वकपको फाइनल विश्वभरका करोडौँ दर्शकमाझ सम्पन्न भएको थियो। यस ऐतिहासिक जितसँगै स्पेनले पुरुष र महिला दुवै विश्वकप उपाधि एकै समयमा आफ्नो नाममा राख्ने पहिलो राष्ट्रसमेत बनेको छ।
