काठमाडौँ । पश्चिमी कोलम्बियामा सोमबार गएको शक्तिशाली भूकम्पमा परी मृत्यु हुनेको संख्या १३२ पुगेको छ भने ५७० भन्दा बढी घाइते भएका छन् । ७.४ म्याग्निच्युडको भूकम्पलाई यस शताब्दीमा कोलम्बियामा गएको सबैभन्दा शक्तिशाली भूकम्पका रूपमा लिइएको छ ।
भूकम्पका कारण कोलम्बियाका विभिन्न सहरमा भवनहरू भत्किएका छन् । अस्पताल, विमानस्थललगायतका महत्वपूर्ण पूर्वाधारमा समेत क्षति पुगेको छ। भग्नावशेषमा मानिसहरू पुरिएको आशंकामा उद्धार तथा खोजी कार्य तीव्र पारिएको छ ।
भूकम्पको केन्द्रबिन्दु चोको प्रान्तको सान होसे डेल पालमार क्षेत्रमा रहेको बताइएको छ । यसको धक्का राजधानी बोगोटासहित देशका विभिन्न भागमा महसुस गरिएको थियो । क्विब्डो, काली, पेरेइरा, आर्मेनिया र मनिजालेस लगायतका सहरमा भौतिक क्षति बढी भएको जनाइएको छ ।
उद्धारकर्मीहरूले भग्नावशेषमा फसेकाहरूको खोजी गरिरहेका छन् । उद्धारका क्रममा केही मानिसलाई जीवितै निकालिएको जनाइएको छ । भूकम्पपछि परकम्पहरू समेत गइरहेकाले प्रभावित क्षेत्रमा थप क्षति हुन सक्ने भन्दै सतर्कता अपनाइएको छ ।
भूकम्पबाट भएको क्षतिको पूर्ण विवरण अझै संकलन भइरहेको अधिकारीहरूले बताएका छन् । उद्धार तथा राहत कार्यलाई प्राथमिकता दिँदै प्रभावित क्षेत्रमा आपत्कालीन व्यवस्थापनका काम अघि बढाइएको छ।
