काठमाडौँ । भृकुटीमण्डपमा जारी नाडा अटो शो २०२६ मा नयाँ जेनेरेसन स्कोडा कोडियाक सार्वजनिक गरिएको छ। स्कोडा नेपालको आधिकारिक वितरक एमएडब्लु एक्स्पान्ज प्रालिले उक्त लक्जरी एसयूभी नेपाली बजारमा औपचारिक रूपमा सार्वजनिक गरेको हो।
नेपालमा नयाँ जेनेरेसन स्कोडा कोडियाक तीन भेरियन्टमा उपलब्ध गराइएको कम्पनीले जनाएको छ। लाउन्जको मूल्य २ करोड १९ लाख ९० हजार रुपैयाँ, स्पोर्टलाइनको २ करोड ३९ लाख ९० हजार रुपैयाँ र सिलेक्सन एल एन्ड केको २ करोड ३९ लाख ९० हजार रुपैयाँ तोकिएको छ।
‘रियल लक्जरी, एज इट शुड बी’ भन्ने मूल नाराका साथ सार्वजनिक गरिएको नयाँ कोडियाकले नेपाली सडकमा लक्जरी एसयूभीको नयाँ मानक स्थापित गर्ने कम्पनीको दाबी छ।
नयाँ कोडियाकलाई केवल अर्को एसयूभीका रूपमा नभई सात सिटयुक्त युरोपेली परिष्कारको स्पष्ट पहिचानका रूपमा प्रस्तुत गरिएको कम्पनीले जनाएको छ। गाडीको प्रत्येक डिजाइन, सतह तथा सामग्रीमा चेक इन्जिनियरिङको शुद्धता र फक्सवागन ग्रुपको इन्जिनियरिङ क्षमताको संयोजन रहेको बताइएको छ।
कम्पनीका अनुसार नयाँ कोडियाकको क्याबिन यात्रुका लागि आरामदायी र शान्त अनुभव प्रदान गर्ने गरी डिजाइन गरिएको छ। यसमा शरीरको बनावटअनुसार आराम प्रदान गर्ने एर्गो सिट्स, सडकको अवस्थाअनुसार प्रभावकारी प्रकाश व्यवस्था गर्ने म्याट्रिक्स एलईडी हेडलाइट्स तथा विभिन्न नियन्त्रणलाई सहज बनाउने आधुनिक स्मार्ट डायल्स जस्ता विशेषता रहेका छन्।
कम्पनीले लक्जरीलाई केवल बाहिरी आकर्षणमा सीमित नराखी गाडीभित्रको आराम, प्रविधि र यात्राको अनुभवसँग जोडिएको जनाएको छ।
गाडी सार्वजनिक गर्दै स्कोडा नेपालका कार्यकारी निर्देशक रौनक अग्रवालले नयाँ कोडियाकसँगै नेपालमा केवल एउटा नयाँ गाडी मात्र नभई लक्जरीको स्पष्ट अवधारणा ल्याइएको बताए।
उनले भने, “नयाँ कोडियाकका साथ हामी नेपालमा केवल एउटा गाडी मात्र ल्याइरहेका छैनौँ-लक्जरी कस्तो हुनुपर्छ भन्ने एउटा स्पष्ट अवधारणा ल्याइरहेका छौँ, जहाँ इमानदारिता, शुद्धता र अनावश्यक तडकभडकविहीन परिष्कार छ। यो वास्तविक युरोपेली लक्जरी हो, जस्तो यो हुनुपर्ने हो।”
