उच्च पादरीले यौनशोषण गरेको पुष्टि,

उच्च पादरीले यौनशोषण गरेको पुष्टि,

मेलबर्न : अस्ट्रेलियाली एक पुनरावेदन अदालतले बुधबार कार्डिनल जर्ज पेलमाथिको बालयौन दुराचारको सजायलाई पुनः सदर गरेको छ। अदालतको उक्त आदेशपछि अदालत परिसरबाहिर भेला भएका पीडित र उनीहरूका समर्थकले खुशी व्यक्त गरेका थिए।

गत वर्ष डिसेम्बरमा तल्लो अदालतको सर्वसम्मत निर्णयका आधारमा कार्डिनल जर्ज दोषी ठहर गरिएका थिए। क्याथोलिक धर्मगुरु पोप फ्रान्सिसका पूर्व अर्थमन्त्री समेत रहेका कार्डिनल जर्जले दुई दशकअघि मेलबर्नस्थित सेन्ट प्याट्रिक क्याथेड्रलमा रहँदा १३ वर्षीय दुई बालकमाथि यौनशोषण गरेको पुष्टि भएको थियो।

भिक्टोरिया पुनरावेदन अदालतका न्यायाधीशको २–१ को निर्णयबाट कार्डिनल जर्जले गरेको पुनरावेदन अस्वीकार गरेको हो। पेलका कानुन व्यवसायीले अब अदालतको आदेशका बारेमा अध्ययन गरी उच्च अदालतमा पुनरावेदन गर्ने बताएका छन्।

कार्डिनल जर्जकी प्रवक्ता काट्रिना लीले अदालतको आदेशबाट कार्डिनल जर्ज निःसन्देह दुःखी भएको बताइन्। क्याथोलिक सम्प्रदायको सर्वोच्च केन्द्र भ्याटिकनले पनि कार्डिनल जर्जको बालयौन शोषणका बारेमा अलग्गै अनुसन्धान गरिरहेको छ। कार्डिनल जर्जले भने आफू निर्दोष रहेको बताउँदै आएका छन्। अस्ट्रेलियाली क्याथोलिक बिसप सम्मेलनले पनि कानुनका दृष्टिबाट सबै अस्ट्रेलियाली नागरिक समान रहेको बताउँदै अदालतको आदेशलाई स्वीकार गर्ने जनाएको छ।

मेलबर्नका मुख्य पादरी पिटर कोमेन्सोलीले विज्ञप्ति प्रकाशन गरी आफूले अदालतको आदेशलाई स्वीकार गर्ने र अरूलाई पनि त्यस्तै गर्न आग्रह गरेका छन्। गत मार्चमा ७८ वर्षीय कार्डिनल जर्जलाई ६ वर्षको कारावासको सजाय दिइएको थियो। उनी अब पोप फ्रान्सिसको कार्डिनल परिषद् वा भ्याटिकनको अधिकारीका रूपमा रहन पाउनेछैनन्।

अस्ट्रेलियाली प्रधानमन्त्री स्कट मरिसनले पनि अदालतको आदेशलगत्तै जर्जलाई यसअघि अस्ट्रेलिया सरकारले प्रदान गरेको सर्वोच्च पदक ‘अर्डर अफ अस्ट्रेलिया’को पदक खोस्ने बताएका छन्।

क्याथोलिक गिर्जाघरहरूमा विश्वभर नै यौनशोषणका खबर आएसँगै पोप फ्रान्सिसमाथि गिर्जाघरहरूको सुधारका बारेमा चर्को दबाब आएको छ।

अन्नपूर्णपोष्ट

Trending News