त्रिशूली-३ ‘बी’ मा उद्धार तीव्र बनाउन माइतीघरमा पीडित परिवारको प्रदर्शन

काठमाडौँ । त्रिशूली-३ ‘बी’ जलविद्युत् आयोजना स्थलमा उद्धार कार्य प्रभावकारी रुपमा अघि बढाउन माग गर्दै पीडित परिवारले काठमाडौँमा प्रदर्शन गरेका छन् । चाँडोभन्दा चाँडो अपर त्रिशूली-३ ‘बी’ जलविद्युत् आयोजना स्थलमा उद्धार कार्य अघि बढाउन माग गर्दै बेपत्ता भएका व्यक्तिका परिवारले काठमाडौँको माइतीघरमा प्रदर्शन गरेका हुन् ।

उनीहरुले मित्रराष्ट्रसँग सहयोग लिएर भएपनि उद्धार कार्य प्रभावकारी बनाउन आग्रह गरेका छन् । त्रिशूली-३ ‘बी’ जलविद्युत् आयोजना स्थलमा बेपत्ता  भएका सुमेश अमात्यको दाइ रमेश अमात्यले १३ दिन बितिसक्दा पनि उद्धार कार्यले गति लिन नसकेपछि सरकारको आँखा खुलाउन र छिटो उद्धारका लागि दबाब दिन धर्नासहित प्रदर्शन गर्नुपरेको बताए ।  बाढी आएको समयमा क्याम्प भवनमा बैठक बसिरहेको र सोही भवन पुरिँदा करिब ४२ जना थुनिएको हुनसक्ने उनले बताए ।

पहिले लगिएको सानो एक्जाभेटरले काम गर्न नसकेको र ठूलो एक्जाभेटर ढुवानी गर्न सक्ने क्षमताको हेलिकप्टर नहुँदा उद्धार रोकिएको उनको भनाइ छ । उनले ठूला हेलिकप्टर र उपकरणका लागि भारत वा चीनजस्ता छिमेकी मुलुकहरूले सहयोग गर्ने तत्परता देखाउँदा पनि सरकारले समयमै पहल नगरेको भन्दै तत्काल उच्च क्षमताका उपकरण ल्याएर उद्धार गर्न माग  गरे ।