मुगुमा तीन घण्टाभित्र दुईपटक भूकम्प, दुवै धक्का ४ म्याग्निच्युडभन्दा माथि

गमगडी । मुगु जिल्लालाई केन्द्रबिन्दु बनाएर बुधबार बिहान तीन घण्टाभित्र दुईपटक भूकम्प गएको छ । राष्ट्रिय भूकम्प मापन तथा अनुसन्धान केन्द्रका अनुसार बुधबार बिहान १ बजेर ५१ मिनेटमा मुगुको आसपास केन्द्रबिन्दु बनाएर ४.५ म्याग्निच्युडको भूकम्प गएको हो ।

त्यसको करिब दुई घण्टा ३७ मिनेटपछि बिहान ४ बजेर २८ मिनेटमा ४.२ म्याग्निच्युडको अर्को भूकम्प गएको केन्द्रले जनाएको छ । दुवै भूकम्पको केन्द्रबिन्दु मुगुको कालै क्षेत्र आसपास रहेको जनाइएको छ । लगातार दुईपटक भूकम्प गएपछि मुगुसहित आसपासका क्षेत्रमा समेत कम्पन महसुस गरिएको समाचारहरूमा उल्लेख छ ।

हालसम्म यी दुई भूकम्पबाट मानवीय तथा भौतिक क्षति भएको विवरण सार्वजनिक भएको छैन । स्थानीय प्रशासनले क्षतिको अवस्थाबारे जानकारी संकलन गरिरहेको बताइएको छ ।

मुगुमा यसअघि पनि भूकम्पका धक्का महसुस हुँदै आएका छन् । पछिल्लो समय पश्चिम नेपालका पहाडी तथा हिमाली जिल्लामा लगातार साना तथा मध्यम खालका भूकम्पका धक्का मापन भइरहेका छन् । यही क्रममा सेप्टेम्बर ८ मा मुस्ताङ केन्द्रबिन्दु भएर ५.३ म्याग्निच्युडको भूकम्प गएको राष्ट्रिय भूकम्प मापन तथा अनुसन्धान केन्द्रको अभिलेखमा उल्लेख छ ।

भूकम्पको पूर्वानुमान गर्न नसकिने भएकाले धक्का महसुस हुँदा नआत्तिन, सुरक्षित स्थानमा जान तथा भूकम्पपछि घर तथा संरचनामा क्षति भए नभएको जाँच गरेर मात्र प्रवेश गर्न विज्ञहरूले सुझाव दिँदै आएका छन् ।