नयाँ ५० रुपैयाँको नोट आजदेखि चलनचल्तीमा
काठमाडौँ । नेपाल राष्ट्र बैंकले नयाँ विशेषता समेटिएको ५० रुपैयाँ दरको बैंकनोट आजदेखि चलनचल्तीमा ल्याएको छ ।
राष्ट्र बैंकले साविककै आकार तथा रङमा नयाँ ५० रुपैयाँको नोट चलनचल्तीमा ल्याएको हो । नयाँ नोटमा गभर्नर प्रा.डा. विश्वनाथ पौडेलको दस्तखत रहेको छ ।
राष्ट्र बैंकका अनुसार नयाँ ५० रुपैयाँको नोटमा संकेत नं. ट २४, ०००००१ देखि ण ७०, ९९९९९९ सम्मका नोट जारी गरिनेछ । नोटमा २०८३ असोज २ गतेदेखि चलनचल्तीमा ल्याउने उल्लेख गरिएको छ ।
नोटको अगाडिको भागको मध्य खण्डमा ‘श्री नेपाल राष्ट्र बैंक, नेपाल सरकारको जमानत प्राप्त यसको रुपैयाँ भुक्तानी माग भएमा नेपाल राष्ट्र बैंकबाट रुपैयाँ ५० रुपैयाँ पचास तुरुन्त पाइने छ’ भन्ने प्रतिज्ञामूलक वाक्यांश राखिएको छ ।
नोटको बायाँतर्फ सगरमाथा हिमालको चित्र तथा दायाँतर्फ लालीगुराँसको पानी छाप रहेको छ । पानी छापको मुनि ‘५०’ अंकित पानी छापसमेत राखिएको राष्ट्र बैंकले जनाएको छ ।
त्यस्तै, १.२ मिलिमिटर चौडा कागजमा बुनिएको सुरक्षा धागोलाई प्रकाशतर्फ पारेर हेर्दा पूर्ण रूपमा देखिने र उक्त धागोमा ‘NRB’ लेखिएको छ ।
नोटको पछाडिको भागमा हिउँ चितुवाको चित्र राखिएको छ । त्यसको माथि ‘नेपाल राष्ट्र बैंक’ तथा तल्लो भागमा सम्बन्धित लेखाइ र सिरिज नम्बर उल्लेख गरिएको छ ।
राष्ट्र बैंकले यसअघि २०७७ असार २२ गतेदेखि ५० रुपैयाँ दरको ‘सिरिज २०१९’ बैंकनोट चलनचल्तीमा ल्याउने सूचना प्रकाशित गरेको थियो । उक्त नोटमा उल्लेखित संकेत नम्बरमध्ये ज ८९, ०००००१ देखि ट २३, ९००००० सम्मका नोट मात्र चलनचल्तीमा ल्याइएको राष्ट्र बैंकले स्पष्ट पारेको छ ।
