चाडपर्व लक्षित सुरक्षा : सादा पोसाकका प्रहरीदेखि तालिमप्राप्त कुकुरसम्म परिचालन

काठमाडौँ । दसैँ, तिहार र छठलगायतका चाडपर्वलाई लक्षित गरी काठमाडौँ उपत्यकामा ३ हजार ५०६ जना प्रहरी परिचालन गरिएको छ । चाडपर्वका समयमा हुन सक्ने चोरी, लुटपाट, ठगी तथा अन्य आपराधिक गतिविधि नियन्त्रण गरी नागरिकलाई सुरक्षित रूपमा चाडपर्व मनाउने वातावरण बनाउन प्रहरीले विशेष सुरक्षा योजना लागू गरेको हो ।

जिल्ला प्रहरी परिसर काठमाडौँका अनुसार बजार, सार्वजनिकस्थल, यातायातका केन्द्र, वित्तीय संस्था तथा बढी भीडभाड हुने क्षेत्रमा सुरक्षा निगरानी बढाइएको छ । चाडपर्वका समयमा किनमेल गर्ने, घर फर्किने तथा आफन्तकहाँ जाने सर्वसाधारणको चहलपहल बढ्ने भएकाले सम्भावित आपराधिक गतिविधि नियन्त्रणमा विशेष ध्यान दिइएको प्रहरीले जनाएको छ ।

परिचालित प्रहरीमध्ये १०० जना सादा पोसाकमा खटिएका छन् । उनीहरूले सार्वजनिकस्थल तथा भीडभाड हुने क्षेत्रमा निगरानी गर्ने, शङ्कास्पद गतिविधिको पहिचान गर्ने र सम्भावित आपराधिक क्रियाकलाप नियन्त्रणमा सहयोग गर्नेछन् ।

सुरक्षा निगरानीलाई प्रभावकारी बनाउन प्रहरीले नियमित गस्तीका अतिरिक्त सामुदायिक सेवा केन्द्र, ड्रोन क्यामेरा, सामाजिक सञ्जाल तथा तालिमप्राप्त कुकुरको समेत प्रयोग गर्ने जनाएको छ । जनशक्ति र प्रविधिको समन्वयबाट शङ्कास्पद गतिविधिको पहिचान तथा सुरक्षा व्यवस्थापनलाई प्रभावकारी बनाइने परिसरले जनाएको छ ।

भीडभाड हुने क्षेत्रमा विशेष निगरानी

चाडपर्वका समयमा सर्वसाधारणको चहलपहल बढ्ने भएकाले बसपार्क, बजार, वित्तीय संस्था तथा तिनका आसपासका क्षेत्र, सरकारी कार्यालय र चाडपर्व लक्षित किनमेल केन्द्रलाई सुरक्षाको प्राथमिकतामा राखिएको छ ।

किनमेल तथा यात्राका क्रममा चोरी, पाकेटमारी, ठगी र अन्य अवाञ्छित गतिविधि हुन सक्ने सम्भावनालाई ध्यानमा राख्दै ती क्षेत्रमा प्रहरी टोली सक्रिय बनाइएको छ । आर्थिक कारोबार हुने स्थानमा पनि निगरानी बढाइएको प्रहरीले जनाएको छ ।

चाडपर्वका समयमा सर्वसाधारणले किनमेल तथा अन्य प्रयोजनका लागि रकम बोकेर हिँड्ने भएकाले सम्भावित आपराधिक गतिविधि नियन्त्रण गर्न वित्तीय संस्था तथा आर्थिक कारोबार हुने क्षेत्रको सुरक्षामा विशेष ध्यान दिइएको छ ।

१४ सेक्टरमा सुरक्षा योजना
काठमाडौँ उपत्यकाका १४ वटा सेक्टरलाई लक्षित गरी चाडपर्व सुरक्षा योजना लागू गरिएको प्रहरी उपरीक्षक थापाले बताए । उनका अनुसार प्रत्येक सेक्टरमा सम्बन्धित प्रहरी वृत्तका प्रमुखलाई परिचालन गरी सुरक्षा व्यवस्थाको प्रत्यक्ष निगरानी गर्ने व्यवस्था मिलाइएको छ ।

सेक्टरगत रूपमा प्रहरी परिचालन गर्दा सम्बन्धित क्षेत्रमा प्रहरीको उपस्थिति प्रभावकारी बनाउनुका साथै घटनाको सूचना प्राप्त हुनासाथ तत्काल टोली परिचालन गर्न सहज हुने प्रहरीको भनाइ छ । प्रहरी वृत्तका प्रमुखले आफ्नो क्षेत्रको सुरक्षा अवस्थाबारे निगरानी गर्नेछन् भने जिल्ला प्रहरी परिसरले समग्र सुरक्षा व्यवस्थाको अनुगमन गर्नेछ ।

सुरक्षा योजनाअन्तर्गत नियमित गस्ती, शङ्कास्पद गतिविधिको निगरानी, प्रहरी जनशक्तिको परिचालन र आवश्यकताअनुसार तत्काल प्रहरी टोली खटाउने व्यवस्थालाई प्राथमिकता दिइएको छ । परिसर प्रमुखसहित वरिष्ठ प्रहरी अधिकृत पनि सुरक्षा योजनाको कार्यान्वयन तथा अनुगमनमा संलग्न हुनेछन् ।

सचेत रहन सर्वसाधारणलाई आग्रह
दसैँ, तिहार र छठका समयमा बजारमा किनमेल गर्नेको चाप, सार्वजनिक यातायातमा यात्रुको बढ्दो आवागमन तथा विभिन्न स्थानमा धार्मिक र सांस्कृतिक गतिविधि हुने भएकाले सुरक्षा व्यवस्था चुस्त बनाइएको प्रहरीले जनाएको छ ।

प्रहरीले सुरक्षा व्यवस्था प्रभावकारी बनाउन जनशक्ति परिचालनसँगै प्रविधिको प्रयोग र विभिन्न निकायसँगको समन्वयलाई पनि प्राथमिकता दिएको छ ।

यसैबीच, प्रहरीले चाडपर्वका समयमा आफ्नो घर तथा सम्पत्तिको सुरक्षामा ध्यान दिन, अपरिचित व्यक्तिको गतिविधिप्रति सचेत रहन र शङ्कास्पद गतिविधि देखिएमा नजिकको प्रहरी कार्यालयमा जानकारी गराउन सर्वसाधारणलाई आग्रह गरेको छ ।