काठमाडौं । कुनै समय नेकपा (एमाले) अध्यक्ष केपी शर्मा ओलीका निकट मानिएका केही नेताहरू पार्टीको ११ औँ महाधिवेशनसम्म आइपुग्दा ओलीबाट अलग हुन थालेका छन्। महाधिवेशनको तयारी, नेतृत्व चयन र आगामी राजनीतिक कार्यदिशाका विषयमा मतभेद बढेपछि ती नेताहरू ओलीसँगको सहकार्यबाट टाढिँदै गएका हुन्।
ओलीसँग लामो समयदेखि नजिक मानिएका ईश्वर पोखरेल, सुरेन्द्र पाण्डे र अष्टलक्ष्मी शाक्य जस्ता नेताहरू पछिल्लो समय पार्टीभित्र फरक धारमा उभिएका छन्। उनीहरूले नेतृत्व शैली, पार्टी सञ्चालनको तरिका र आगामी रणनीतिबारे असन्तुष्टि जनाउँदै आएका छन्।
साथै, एमाले नेता रघुजी पन्त, प्रचार प्रसार बिभाग प्रमुख राजेन्द्र गौतम, नेता कृष्ण गोपाल श्रेष्ठ र गोकुल बास्कोटाले समेत ओलीको साथ छोडेर फरक धार बनाएका छन् ।
पार्टी स्रोतका अनुसार ती नेताहरूले ओलीको नेतृत्वमाथि तीन प्रमुख विषयमा असहमति जनाएका छन्। पार्टी निर्णय प्रक्रियामा सीमित व्यक्तिको प्रभाव बढेको र सामूहिक नेतृत्व कमजोर बनेको आरोप छ।
पछिल्ला निर्वाचनमा पार्टीले अपेक्षित नतिजा ल्याउन नसक्नुको जिम्मेवारी नेतृत्वले लिनुपर्ने उनीहरूको भनाइ छ।
त्यस्तै, युवा पुस्ता र तल्लो तहका कार्यकर्ताको भावना सम्बोधन गर्न पार्टी नेतृत्व असफल भएको उनीहरूको ठम्याइ छ।
वरिष्ठ नेता ईश्वर पोखरेलले महाधिवेशनमा नेतृत्व परिवर्तन आवश्यक भएको भन्दै अध्यक्ष पदमा उमेद्वारी समेत दिएका छन् । पार्टी नेता सुरेन्द्र पाण्डे र अष्टलक्ष्मी शाक्यले पनि पार्टीभित्र वैकल्पिक नेतृत्वको आवश्यकता औँल्याउँदै आएका छन्।
११ औँ महाधिवेशनमा ओली पक्ष र नेतृत्व परिवर्तन चाहने समूहबीच स्पष्ट विभाजन देखिएको छ। ओली पक्षले स्थायित्व र अनुभवलाई जोड दिँदै निरन्तरताको पक्षमा अभियान चलाइरहेको छ भने ईश्वर समूहले पार्टीलाई नयाँ ढंगले पुनर्गठन गर्नुपर्ने आवश्यकता औँल्याइरहेको छ।
पार्टीभित्रको यो मतभेदले महाधिवेशनको नेतृत्व चयन प्रक्रिया थप प्रतिस्पर्धात्मक हुने संकेत देखिएको छ।
महाधिवेशनपछि यी नेताहरू पार्टीभित्रै रहेर फरक धारको राजनीति गर्ने सम्भावना रहेको पार्टी स्रोतले जनाएको छ। नेतृत्व परिवर्तनको प्रयास सफल नभए पनि उनीहरू पार्टीभित्र सुधार र पुनर्संरचनाको दबाब निरन्तर राख्ने रणनीतिमा देखिएका छन्।
एमालेको ११ औँ महाधिवेशन भित्रभित्रै विभाजन र नेतृत्व चुनौतीको महत्त्वपूर्ण क्षण बनिसकेको छ ।
ओलीका निकट मानिएका नेताहरुले उनको नेतृत्वलाई स्पष्ट समर्थन गरिरहन नसक्ने संकेत गर्दै आलोचना र नयाँ विकल्पतर्फ उन्मुख हुँदै गएका छन् । जसले पार्टीभित्र नयाँ राजनीतिक समीकरण जन्माएको छ ।
अबको महाधिवेशन परिणामले एमालेको नेतृत्व संरचना मात्र होइन, आगामी चुनावी रणनिति, युवा शक्ति र पार्टीको भविष्य पनि निर्धारण गर्नेछ ।
