चन्द्रे कामीका बुबा भन्छन्- ‘खै छोरालाई कुन कर्णाली नदीमा फालेहोलान् अत्तोपत्तो छैन !’

diyopost.com
दियो पोस्ट  मंगलबार, पौष ०६, २०७८ | १५:४१:३१

सिमकोट – अन्तरजातीयको युवतीसँग विवाह गरेकै कारण हुम्लाका एक युवक हप्ता दिनदेखि बेपत्ता पारिएका छन् । दलित युवकले मल्ल थरकी युवतीलाई विवाह गरेका कारण माइती पक्षद्वारा निर्घातरूपमा कुटपिट गर्दै अपहरण गरी बेपत्ता पारेका हुन् ।

सर्केगाड गाउँपालिका–१ को जैरगाउँका १९ वर्षीय चन्द्रे कामीले मुगुको सोरु गाउँपालिका–४ को लिप्रुगाउँकी १९ वर्षीया रमिला मल्ल (सुन्तली) सँग अन्तरजातीय विवाह गरेको भन्दै युवती पक्षले युवक पक्षीय कामीलाई निर्घात कुटपिट गर्नुका साथै हप्ता दिनदेखि पारेका छन् भने घरमा तोडफोड समेत गरेका छन् ।

गत मङ्सिर ५ गते मल्लको घरबाटै भागी विवाह गरेर आफ्नो घरमा ल्याएको भन्दै युवती पक्षका करिब २० जनासम्मको समूहले मङ्सिर २९ गते बुधबार रातिको समयमा जैरका गाउँका अन्य छिमेकीका घरमा ताला लगाई आफ्नो घरको ढोका, झ्याल र छतको दाँती फाल्दै घरपरिवारलाई निर्घातरूपमा कुटपिट गरेको गुनासो बुवा धनजय लोहार (कामी)ले गरे ।

बुवा कामीले भने, ‘अन्तरजातीको युवती विवाह गरेका कारण छोराले कुटाई खानुपर्‍यो, घरमा तोडफोड भयो, कुटपिटसँगै छोरालाई अपहरण गरी लिएर आजसम्म भेटाउन सकिएको छैन । खै छोरालाई कुन कर्णाली नदीमा फालेहोलान् अत्तोपत्तो छैन,’ बुवाले दुःखेसो गरे। चन्द्रे गाउँकै सरस्वती माध्यमिक विद्यालयमा कक्षा ११ मा पढ्दै आएका थिए ।

चन्द्रे कामीकाे घर भएकाे गाउँ ।

कामी र मल्ल अन्तरजातीय भएका कारण भागी विवाह गरेका कारण उनीहरूले विवाह गरेर भागेको दिनदेखि युवती माइतपक्षको धम्की सहँदै आउनुपरेको थियो । माइती पक्षको धम्कीका कारण छोराबुहारी सर्केगार्ड गाउँपालिकाका वडा नं २ को रीपगाउँमा बस्दै आएको बुवा कामीले बताए ।

सोही वडाका अध्यक्ष गोकुल बुढाका अनुुसार भोलिपल्ट घरभन्दा दुई/तीन सय मिटरको दूरीमा चन्द्रेको टिसर्ट भेटिएको थियो । केटी पक्षले चन्द्रेको हात पछाडि बाँधेर नांगै कुट्दै लगेको उनको भनाइ छ ।

‘२० वर्षमुनिको विवाह दर्ता हुँदैन भने। त्यसपछि २४ मंसिरमा सुन्तलीलाई लिएर चन्द्रे जैरस्थित आफ्नो घर फर्के भन्ने सुनेकाे हुँ। पुस २९ गते राति माइती पक्षका आएर केटाकेटी दुवैलाई उठाएर लिएछन्,’ उनले भने, ‘केटालाई दुवै हात बाँधेर कुटपिट गर्दै लगिएको भन्ने कुरा आएको छ।’

‘घरदेखि करिब १५ मिटर पर केटाको टिसर्ट भेटिएको छ। कुट्दै पिट्दै लिएर गएको हाे भने केटालाई मारेर फालेको हुन सक्छ’, उनले भने।

यता लिपु्रका माइती पक्षले खोजिरहेको भए पनि भेट्टाउन सकेका थिएनन् । पछि माइती पक्षबाट ‘अहिलेको जमानामा पनि के को जातपात, आउ भेटौँ’ भनेर बोलाएपछि उक्त जोडी घरमा आएका हुन् । बुधबार राति मात्रै युवकको घरमा माइतीपक्ष आएर युवकलाई निर्घात कुटपिट गरेका थिए । हुम्लाबाट युवायुवतीलाई लिएर मुगु पुगेको भए पनि युवतीलाई प्रहरीले नियन्त्रणमा लिएको छ भने युवक अझै बेपत्ता पारिएका छन् । निर्घात कुटपिटपछि युवकलाई कहाँ लिए अझै अत्तोपत्तो हुनसकेको छैन ।

घटनाका विषयमा प्रहरीलाई जानकारी आएलगत्तै जिल्ला प्रहरी कार्यालय हुम्लाबाट प्रहरी नायब उपरीक्षक हेरम्ब शर्माको टोली र मुगु जिल्लाबाट प्रहरी टोली घटनास्थलमा पुगिसकेको प्रमुख जिल्ला अधिकारी गणेश आचर्याले बताए।  प्रमुख जिल्ला अधिकारी आर्चायका अनुसार बेपत्ता युवक कामी र युवती मल्ल पक्षका दुवैसँग बुझ्ने र आवश्यक अनुसुन्धान भइरहेकाले युवती पक्षको बुवालाई प्रहरीले अनुसुन्धानका लागि नियन्त्रण लिएको बताए।

प्रहरीले माइती पक्षका बुवा र युवतीलाई अनुसन्धानका लागि नियन्त्रणमा लिएको जानकारी प्राप्त भएको छ । घटनास्थलमा प्रहरी नायब उपरीक्षक शर्मा आफैँ पुगेका छन् । बेपत्ता पारिएका युवक अझै भेट्टाउन सकिएको छैन । प्रहरीले अनुसन्धान र खोजी तीव्र पारेको बताएको छ ।

चन्द्रे कामीको घटनाले रुकुम घटनाजस्तै अप्रिय अवस्थाको संकेत गरिरहेको भन्दै विभिन्न संघसंस्थाले  चन्द्रेकाे खाेजी र दाेषीमाथि कारबाही माग गर्दै विज्ञप्ति जारी गरेका छन् ।

सम्बन्धित खबर