खाना नपकाएको भन्दै श्रीमतीको हत्या, श्रीमान पक्राउ
झापा । झापाको अर्जुनधारा नगरपालिकामा एक व्यक्तिले घरायसी विवादमा श्रीमतीको हत्या गरेका छन्। इलाका प्रहरी कार्यालय अनारमनीका प्रहरी नायब उपरीक्षक रुगमबहादुर कुँवरका अनुसार अर्जुनधारा निवासी विश्वराज घिसिङले ३६ वर्षीया श्रीमती प्रमिला भुजेल घिसिङको हत्या गरेका हुन्। कार्यालयका अनुसार मंगलबार साँझ ६ बजेतिर खाना नपकाएको विषयमा श्रीमान-श्रीमतीबीच झगडा भएको थियो। त्यहीबेला उनका ३५ वर्षीय श्रीमान विश्वराज घिसिङले पेटमा लात्तीले हिर्काएका थिए। श्रीमतीको हत्यामा संलग्न भएको अभियोगमा प्रहरीले विश्वराजलाई राति नै नियन्त्रणमा लिएको प्रहरी नायब उपरीक्षक कुँवरले जानकारी दिए।
भोजपुरको अरुण गाउँपालिका–१ स्थायी घर भएका घिसिङ विगत दुई वर्षदेखि अर्जुनधारामा डेरामा बसेर निर्माण क्षेत्रमा ज्याला मजदुरी गर्दै आएको बताइएको छ।
