काठमाडौं । सत्तारुढ दलहरूको उच्चस्तरीय राजनीतिक संयन्त्रको बैठकमा राष्ट्रपति निर्वाचनबारे कुनै छलफल भएन । एमाले अध्यक्ष केपी शर्मा ओली नेतृत्वमा रहेको संयन्त्रको बैठकमा सरकारका अहिलेसम्मका कामका बारेमा समीक्षा भएको राप्रपा अध्यक्षसमेत रहेका उपप्रधान तथा ऊर्जामन्त्री राजेन्द्र लिङ्देनले जानकारी दिए । बैठकबाट आफू भने निस्किएको जानकारी दिँदै उपप्रधानमन्त्री लिङ्देनले भने, ‘अहिलेसम्म सरकारले गरेका कामका बारेमा समीक्षा भयो । अब कसरी अगाडि बढ्ने भन्नेमा पनि छलफल भयो ।’
राष्ट्रपति निर्वाचनका बारेमा पनि केही छलफल भयो भन्ने प्रश्नमा लिङ्देनले भने, ‘राष्ट्रपति चुनावका बारेमा छलफल गर्नुपर्ने कुरै के छ र ? सबै पहिले नै तय भइसकेको कुरामा छलफल आवश्यक भएन नि ‘
बैठकमा संयन्त्रका संयोजक ओली, प्रधानमन्त्री पुष्पकमल दाहाल, राप्रपा अध्यक्ष लिङ्देन र रास्वपा सभापति रवि लामिछाने सहभागी थिए ।
