सन्धिखर्क-४ मा मतदान अधिकृतको हस्ताक्षर बिनाका मतपत्र भेटिएपछि मतदान स्थगित

काठमाडौँ । अर्घाखाँचीको सन्धिखर्क नगरपालिका वडा नम्बर ४ मा रहेको मतदान केन्द्रमा मतदान अधिकृतको हस्ताक्षर नभएका मतपत्र फेला परेपछि मतदान प्रक्रिया स्थगित गरिएको छ।

मतदानका क्रममा केही मतपत्रमा मतदान अधिकृतको हस्ताक्षर नभएको पाइएको भन्दै राजनीतिक दलका प्रतिनिधि तथा मतदान स्थलमा रहेका सरोकारवालाले आपत्ति जनाएपछि विवाद उत्पन्न भएको हो।

विवाद बढ्दै गएपछि मतदान कार्य अस्थायी रूपमा रोकिएको स्थानीय स्रोतले जनाएको छ। निर्वाचन प्रक्रियाअनुसार मतदातालाई वितरण गरिने प्रत्येक मतपत्रमा मतदान अधिकृतको हस्ताक्षर अनिवार्य हुने व्यवस्था छ। हस्ताक्षर नभएको मतपत्र प्रयोग भएको आशंका भएपछि दलका प्रतिनिधिहरूले छानबिनको माग गरेका छन्।

विवाद समाधानका लागि सम्बन्धित अधिकारी, सुरक्षा निकाय तथा राजनीतिक दलका प्रतिनिधिबीच सर्वपक्षीय छलफलको प्रयास भइरहेको बताइएको छ। छलफलपछि मात्र मतदान पुनः सुरु गर्ने वा अन्य निर्णय लिने विषयमा टुंगो लाग्ने जनाइएको छ।

जिल्ला निर्वाचन कार्यालयका अधिकारीहरूका अनुसार निर्वाचन निष्पक्ष र व्यवस्थित बनाउन आवश्यक प्रक्रिया अपनाइँदै छ। समस्याको समाधान भएपछि मात्र मतदान पुनः सञ्चालन गरिने बताइएको छ।

जिल्लामा प्रतिनिधिसभा सदस्य निर्वाचनका लागि आवश्यक तयारी पूरा गरी विभिन्न मतदान केन्द्रमा कर्मचारी र सुरक्षाकर्मी खटाइएको थियो।