संयुक्त राज्य अमेरिकाको भर्जिनियास्थित एउटा अदालतले बिहीवार राष्ट्रपति डोनल्ड ट्रम्पका भूतपूर्व सहयोगीलाई ब्याङ्क ठगी र कर हिनामिनाको अभियोगमा ४७ महिनाको जेल सजाय सुनाएको छ।
गत वर्ष अदालतले पल म्यानफोर्टले युक्रेनमा राजनीतिक परामर्शबाट कमाएको दशौँ लाख डलर लुकाएको ठहर गरेको थियो।
म्यानफोर्ट सन् २०१६ मा सम्पन्न राष्ट्रपतीय निर्वाचनमा ट्रम्पको निर्वाचन अभियानको संयोजक थिए।
अदालतले गैरकानुनी रूपमा गुटबन्दी गरेको अभियोगमा उनलाई अर्को सजाय सुनाउन बाँकी छ।
राष्ट्रपतीय निर्वाचनका बेला ट्रम्प र रुसको सम्बन्धबारे एउटा छानबिन सुरु भएपछि उनीविरुद्ध ती अभियोगहरू लगाइएको थियो।
अदालतमा के भयो?
म्यानफोर्टले दुई करोड ४० लाख डलर क्षतिपूर्ति र ५० हजार डलर जरिवाना तिर्नुपर्ने फैसला अदालतले सुनाएको छ।
बिहीवार साँझ अदालतमा उपस्थित भएका म्यानफोर्टले विगत दुई वर्ष आफ्नो जीवनको सबैभन्दा कठिन समय भएको बताएका थिए।
आफू अपमानित र लज्जित भएको भन्दै उनले न्यायाधीशलाई आफूप्रति सहानुभूति राख्न अनुरोध गरेका थिए। उनले आफ्नो जीवन व्यावसायिक र आर्थिक रूपमा भद्रगोल भएको पनि स्वीकारे।
तर न्यायाधीश टीएस एलिसले म्यानफोर्टले अनुचित गतिविधिमा संलग्न भएर पनि पश्चात्ताप नगरेकोमा आश्चर्य व्यक्त गरे।
उनीमाथि लागेका अन्य १० अभियोगलाई भने अदालतले खारेज गरिदिएको छ।
म्युलरको छानबिन कुन स्थितिमा छ?
अमेरिकाको न्याय मन्त्रालयका विशेष अनुसन्धानकर्ता रोबर्ट म्युलरले २२ महिनाअघि ट्रम्प र रुसको सम्बन्धबारे थालेको अनुसन्धान सम्पन्न हुन लागेको ठानिएको छ।
तर म्युलरले गरेको छानबिनका आधारमा म्यानफोर्टलाई कुनै अभियोग लगाइएको थिएन।
न्यायाधीशले म्यानफोर्ट रुससँग मिलेको भन्ने विषयसँग अहिलेको मुद्दाको सम्बन्ध नभएको बताए।
म्युलरले आफ्नो प्रतिवेदन चाँडै महान्यायाधिवक्तालाई बुझाउने अपेक्षा गरिएको छ।
म्यानफोर्टले अदालती अनुसन्धानमा असहयोग गरेको मुद्दामा निर्णय आउन बाँकी नै छ। त्यो मुद्दामा म्यानफोर्टले थप १० वर्ष जेल सजाय पाउन सक्छन्।
ट्रम्पसहित चार अमेरिकी राष्ट्रपति तथा धेरै रिपब्लिकन नेताका ‘राजनीतिक गुरु’ मानिने उनी जेल जानुको प्रभाव आउँदो राष्ट्रपतीय चुनावमा पर्ने देखिन्छ।
म्यानफोर्टले सन् २०१६ मा ट्रम्पको चुनावी संयोजकका रूपमा तीन महिना काम गरेका थिए।
पहिला युक्रेनमा पनि काम गरेको भन्दै उनलाई राजीनामा दिन बाध्य पारिएको थियो।
सन् २०१७ को अक्टोबरमा न्याय मन्त्रालयले सुरु गेको विशेष अनुसन्धानका लागि पक्राउ पर्ने ट्रम्प निकटस्थमध्ये उनी पहिलो व्यक्ति हुन्।
