काठमाडौं । राष्ट्रिय स्वतन्त्र पार्टी रास्वपाका उपसभापति तथा सांसद डोलप्रसाद (डीपी)अर्याल प्रतिनिधि सभाको सभामुख पदमा निर्विरोध निर्वाचित भएका छन्। आइतबार बसेको प्रतिनिधि सभाको बैठकमा अर्याललाई सभामुख पदमा निर्वाचित भएको घोषणा गरिएको हो ।
बैठकको अध्यक्षता गरिरहेका ज्येष्ठ सदस्य अर्जुननरसिंह केसीले अर्याल निर्विरोध निर्वाचित भएको घोषणा गरेका थिए। सभामुख पदका लागि अन्य कुनै उम्मेदवारी नपरेपछि अर्याल स्वतः निर्वाचित भएका हुन्।
अर्यालको चयनसँगै प्रतिनिधि सभाले नयाँ नेतृत्व पाएको छ। सभामुखको रूपमा उनले संसद् सञ्चालन, बैठक व्यवस्थापन तथा विधेयक प्रक्रियालाई प्रभावकारी बनाउने महत्वपूर्ण जिम्मेवारी सम्हाल्नेछन्।
नयाँ सभामुख चयनसँगै संसद् बैठकहरू अझ व्यवस्थित र सक्रिय हुने अपेक्षा गरिएको छ। यसअघि राष्ट्रिय स्वतन्त्र पार्टीभित्र सक्रिय भूमिका निभाउँदै आएका अर्यालको यो नियुक्तिलाई राजनीतिक रूपमा महत्वपूर्ण उपलब्धिका रूपमा हेरिएको छ।
