भूकम्पप्रभावितलाई अनुदानमा चुलो वितरण

diyopost.com
bestnp  शुक्रबार, बैशाख १७, २०७३ | ३:५५:२७

बनेपा, १७ वैशाख । नेपाल सरकार वैकल्पिक ऊर्जा प्रवद्र्धन केन्द्र, ललितपुरले भूकम्प प्रभावितका लागि काभ्रेपलाञ्चोकको च्याम्रेङबेसी गाविसमा उपलब्ध गराएको रु १० लाख ४३ हजार बराबरको सुधारिएको चुलो अनुदानमा बिहीबार वितरण गरियो ।

जिल्ला दैवी प्रकोप उद्धार समिति, काभ्रेपलाञ्चोकको सिफारिसमा जिविस, वातावरण ऊर्जा तथा जलवायु परिवर्तन शाखाले सो गाविसमा मात्रै कुल २९८ सुधारिएको चुलो वितरण गरेको हो । जिविस, वातावरण ऊर्जा तथा जलवायु परिवर्तन शाखाका प्रमुख अन्जित गौतमले भूकम्पका कारण करिब २० हजार सुधारिएको चुलो नष्ट भएको उल्लेख गर्दै तत्कालका लागि पाँच गाविसमा अनुदानमा चुलो वितरणको कार्यक्रम रहेको जानकारी दिए  ।

उनका अनुसार जिल्लाका पाँच गाविसमा कुल रु ९८ लाख ८० हजार बराबरको एक हजार ६०८ सुधारिएको चुलो वितरण हुने जानकारी दिँदै जिल्लाको वेखसिम्ले, च्यासिङखर्कसहित तीन गाविसमा रु ४६ लाख ५५ हजार बराबरको एक हजार ३३० सुधारिएको चुलोे वितरण भएको बताउनुभयो । “हामीले धुवाँमुक्त गाविसलाई प्राथमिकतामा राखेर भूकम्प प्रभावितलाई यो चुलोे वितरण गरेका हाँै”, उनले भने  ।

जिल्लाका तीन गाविसबाहेक पोखरीनारायणस्थान गाविसमा ६७ र सरमथली गाविसमा २८३ थप सुधारिएको चुलो वितरण हुने उल्लेख गर्दै गौतमले अन्य विभिन्न गाविसमा पनि भूकम्प प्रभावितका लागि सुधारिएको चुलो माग भएको बताए ।

उहाँले चुलो वितरणपछि उपयोग भएको छ वा छैन भन्ने विषयमा अनुगमन गरिने जानकारी दिँदै चुलोलाई सदुपयोग गर्न समुदायलाई आग्रह गर्नुभयो । ग्रामीण सशक्तीकरण स्रोत व्यवस्थापन केन्द्र (रिमरेक)का कार्यकारी निर्देशक गोकुल गौतमले सुधारिएको चुलो वातावरणमैत्री भएको उल्लेख गर्दै यसले गर्दा धुवाँको जोखिमबाट बच्न सकिने बताए  ।

सम्बन्धित खबर