काठमाडौं । विभिन्न स्थानमा सवारी दुर्घटना हुँदा ६ जनाको मृत्यु भएको छ । काठमाडौंको कागेश्वरी मनोहरा नगरपालिका–९ खहरे गोठाटारमा बा.५ ख ११६० नम्बरको निशान गाडी र ना.८ ख ३५४४ नम्बरको टिपर एकआपसको ठक्करबाट सोमबार राति दुर्घटना हुँदा बा.५ ख ११६० नम्बरको गाडी चालकको मृत्यु भएको छ । मृत्यु हुनेमा रामेछाप मन्थली गाउँपालिका–७ घर भई हाल काठमाडौं तेजबिनायक बस्ने १९ वर्षीय डिल बहादुर माझी रहेका छन् । दुर्घटनामा गम्भीर घाइते भएका उनको ट्रमा अस्पतालमा उपचारको क्रममा मृत्यु भएको हो । साथै दुर्घटनामा घाइते भएका टिपर चालकको सोही अस्पतालमा उपचार भइरहेको छ ।
यसैगरी सिरहाको नवराजपुर गाउँपालिका–१ भगवतीपुर चोकस्थित सडकमा स.१० प ६३२० नम्बरको मोटरसाइकलको ठक्करबाट पैदलयात्रीको मृत्यु भएको छ । मृत्यु हुनेमा सोही ठाउँ बस्ने ५५ वर्षीय छविल प्रसाद साह रहेका छन् । ठक्करबाट गम्भीर घाइते भएका उनको प्रादेशिक अस्पताल लहानमा उपचारको क्रममा सोमबार राति मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।
यसैगरी बाराको महागढीमाई नगरपालिका–८ थलही पुलस्थित सडकमा प्र.२–०३–०१४ प ६१५० नम्बरको मोटरसाइकल आफैँ अनियन्त्रित भई सोमबार राति दुर्घटना हुँदा मोटरसाइकल चालकको मृत्यु भएको छ । मृत्यु हुनेमा पचरौता नगरपालिका–८ बस्ने २१ वर्षीय नितेश चौधरी रहेका छन् । दुर्घटनामा गम्भीर घाइते भएका उनको उपचारको लागि प्रादेशिक अस्पताल कलैयातर्फ लैजाने क्रममा बाटोमै मृत्यु भएको हो । साथै दुर्घटनामा घाइते भएका मोटरसाइकलमा सवार अन्य १ जनाको सोही अस्पतालमा उपचार भइरहेको छ ।
साथै बाराकै सिम्रौनगढ नगरपालिका–८ कचोर्वामा हाल नम्बर नखुलेको मोटरसाइकल अनियन्त्रित भई सोमबार राति दुर्घटना हुँदा मोटरसाइकलमा सवार एक जनाको मृत्यु भएको छ । मृत्यु हुनेमा भारत घर भएका २८ वर्षीय मुक्ति नारायण यादव रहेका छन् । दुर्घटनमा गम्भीर घाइते भएका उनको प्रादेशिक अस्पताल कलैया हुँदै एलएस न्यूरो हस्पिटल गण्डकमा थप उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको
छ ।
यसैगरी ईलामको ईलाम नगरपालिका–७ जिरोस्थित सडक छेउमा रोकी राखेको प्र.१–१०३–००१ त ००१२ नम्बरको ट्याक्टरमा मे.११ प ८२१५ नम्बरको मोटरसाइकल ठक्करबाट दुर्घटना हुँदा मोटरसाइकल चालकको सोमबार राति मृत्यु भएको छ । मृत्यु हुनेमा सोही नगरपालिका–३ पुवामझुवा बस्ने २५ वर्षीय संजय राई रहेका छन् । दुर्घटनामा गम्भीर घाइते भएका उनको जिल्ला अस्पताल हुँदै थप उपचारको लागि बिएण्डसि अस्पताल बिर्तामोड झापातर्फ लैजाने क्रममा बाटोमै मृत्यु भएको हो ।
साथै कपिलवस्तुको कपिलवस्तु नगरपालिका–१० पचेहरा चोकस्थित सडकमा लु.३९ प १५९ नम्बरको मोटरसाइकल आफैँ अनियन्त्रित भई सोमबार राति दुर्घटना हुँदा मोटरसाइकल चालकको मृत्यु भएको छ । मृत्यु हुनेका सोही ठाउँ बस्ने १९ वर्षीय कम्लेस रैदास रहेका छन् । दुर्घटनामा गम्भीर घाइते भएका उनको जिल्ला अस्पताल तौलिहवामा उपचारको क्रममा मृत्यु भएको हो ।
दुर्घटनाका सम्बन्धमा प्रहरीले थप अनुसन्धान गरिरहेको छ ।
