काठमाडौं । हर्क साम्पाङले प्रतिनिधिसभाको बैठक बहिष्कार गरेका छन् । सरकारको नीति तथा कार्यक्रममाथि छलफल गरियोस् भन्ने प्रस्ताव प्रस्तुत गर्ने क्रममा प्रधानमन्त्री उपस्थित नभएपछि उनले संसद् बैठक छाडेका हुन्।
प्रतिनिधिसभाको बुधबारको बैठकमा सरकारको वार्षिक नीति तथा कार्यक्रममाथि छलफल अघि बढाउने कार्यसूची रहेको थियो । संसद् सचिवालयका अनुसार प्रधानमन्त्री बालेन्द्र शाहले नीति तथा कार्यक्रममाथि उठेका प्रश्नको जवाफ दिने कार्यक्रम तय गरिएको थियो ।
तर बैठकमा प्रधानमन्त्री अनुपस्थित भएपछि प्रतिपक्षी दलका सांसदहरूले आपत्ति जनाएका थिए । नेपाली कांग्रेस, एमाले, राप्रपालगायत दलका सांसदहरूले प्रधानमन्त्री स्वयं उपस्थित भएर प्रस्ताव पेश गर्नुपर्ने माग गरेका थिए । यही क्रममा हर्क साम्पाङले प्रधानमन्त्रीको अनुपस्थितिलाई “संसद्प्रतिको बेवास्ता” भन्दै विरोध जनाउँदै बैठक बहिष्कार गरेका हुन्।
बैठकमै साम्पाङले प्रधानमन्त्रीले संसद्लाई सम्बोधन गर्नुपर्ने बताएका थिए । उनले सांसदहरूको प्रश्नको जवाफ नदिनु भनेको जनताको प्रश्नको जवाफ नदिनु सरह हुने टिप्पणी गरेका थिए।
यसअघि पनि साम्पाङले प्रधानमन्त्रीले बोलाएको अनौपचारिक बैठक बहिष्कार गर्दै संसद् नियमित सञ्चालन हुनुपर्ने माग राखेका थिए । उनले “कोठे बैठक” भन्दा संसद्मै छलफल हुनुपर्ने अडान सार्वजनिक रूपमा राख्दै आएका छन्।
