काठमाडौं । रोटरी क्लब अफ बानेश्वरले स्वास्थ्य, शिक्षा, वातावरण संरक्षण तथा सामुदायिक सेवाका विविध क्षेत्रमा व्यापक र प्रभावकारी कार्यक्रम सञ्चालन गर्दै सामाजिक उत्तरदायित्वलाई व्यवहारमा उतारेको छ। अध्यक्ष रोटेरियन रुपाली सरावगीको नेतृत्व तथा रोटरी इन्टरनेशनलको विश्वव्यापी नाराअनुसार क्लबले ग्रामीण क्षेत्रदेखि शहरी समुदायसम्म सेवा विस्तार गर्दै विभिन्न क्षेत्रमा उल्लेखनीय काम अघि बढाएको हो।
क्लबका सदस्यहरूले नुवाकोट र काभ्रेका दुर्गम क्षेत्रदेखि काठमाडौंका विद्यालय र सार्वजनिक स्थानसम्म पुगेर स्वास्थ्य सेवा, किशोर-किशोरी शिक्षा, सडक सुरक्षा, वातावरण संरक्षण, राहत वितरण तथा अन्तर्राष्ट्रिय सहकार्यका कार्यक्रम सञ्चालन गरेका छन्।
स्वास्थ्य सेवाको पहुँच विस्तार गर्ने उद्देश्यले क्लबले २५ जनवरी २०२६ मा काठमाडौं मेडिकल कलेजसँग सहकार्य गर्दै सामुदायिक स्वास्थ्य शिविर आयोजना गरेको थियो। शिविरमा जनरल मेडिसिन, शल्यचिकित्सा, बालरोग, हाडजोर्नी, स्त्री तथा प्रसूति रोग, दन्त, आँखा तथा नाक–कान–घाँटी सेवासहित ईसीजी, अल्ट्रासाउन्ड तथा प्रयोगशाला परीक्षण सुविधा उपलब्ध गराइएको बताइएको छ ।
कार्यक्रममा ३५० भन्दा बढी व्यक्तिको सहभागिता रहेको थियो भने औषधि कम्पनीहरूको सहयोगमा १ लाख १४ हजार रुपैयाँ बराबरको निःशुल्क औषधि वितरण गरिएको क्लबले जनाएको छ। यस कार्यक्रमले ग्रामीण क्षेत्रमा गुणस्तरीय स्वास्थ्य सेवाको आवश्यकता अझै उच्च रहेको सन्देश दिएको छ।
शिक्षा र किशोर स्वास्थ्य क्षेत्रमा क्लबले प्यारी एजुकेशन प्रालिसँग मिलेर “उज्यालो बाटो” परियोजना सञ्चालन गरेको थियो। मुलपानीस्थित श्री आनन्द भैरव माध्यमिक विद्यालयमा ९ नोभेम्बर २०२५ देखि १५ मार्च २०२६ सम्म सञ्चालन गरिएको कार्यक्रममा कक्षा ७ देखि ९ सम्मका ३०४ विद्यार्थी सहभागी भएका थिए। कार्यक्रममा किशोरावस्था, महिनावारी स्वास्थ्य, प्रजनन स्वास्थ्य, सहमति, लैंगिक पहिचान, मानसिक स्वास्थ्य तथा मिडिया साक्षरताजस्ता विषयहरूलाई सहभागितामूलक ढंगले प्रस्तुत गरिएको थियो। कार्यक्रमको अन्त्यसम्म विद्यार्थीहरूमा संवेदनशील विषयमा खुलेर संवाद गर्ने आत्मविश्वास विकास भएको बताइएको छ।
यसअघि १८ अक्टोबर २०२५ मा अल्फा केयरसँगको सहकार्यमा बानेश्वरस्थित अल्फा बिटा कम्प्लेक्समा निःशुल्क स्वास्थ्य परीक्षण तथा रक्तदान कार्यक्रम आयोजना गरिएको थियो। कार्यक्रममा २०० भन्दा बढी सहभागी भएका थिए भने २५ जनाभन्दा बढीले रक्तदान गरेका थिए। साथै, १० जनवरी २०२६ मा सिटी सेन्टरमा आयोजित अर्को रक्तदान कार्यक्रममार्फत ८ पिन्ट रगत संकलन गरिएको थियो।
शैक्षिक पूर्वाधार विकासतर्फ क्लबले फ्रान्सको डिस्ट्रिक्ट १६८० अन्तर्गतको रोटरी क्लब अफ एन्हेसिसहाइमसँग सहकार्य गरी काभ्रेको खानिखोलास्थित श्री भैरव आधारभूत विद्यालय पुनर्निर्माण परियोजना स्वीकृत गराएको छ। थप कक्षाकोठा निर्माणमार्फत विद्यालयको क्षमता विस्तार गरी १०० विद्यार्थी पुर्याउने लक्ष्य राखिएको छ। निर्माण कार्यका प्रारम्भिक गतिविधि सुरु भइसकेका छन्।
त्यसैगरी, ‘Warm Hearts, Warm Paths’ कार्यक्रममार्फत खानिखोलाकै श्री जनहित माध्यमिक विद्यालयका १६२ विद्यार्थीलाई जाडो मौसममा न्यानो ट्र्याकसुट वितरण गरिएको थियो। यस पहलले विद्यार्थीहरूको सहज अध्ययन वातावरण निर्माणमा सहयोग पुर्याएको क्लबले जनाएको छ।
काठमाडौंमा विद्यालय क्षेत्रको सुरक्षा सुधार गर्ने उद्देश्यले क्लबले ‘स्कूल फ्रेन्डली जोन’ अभियान अघि बढाएको छ। यसअन्तर्गत बानेश्वर क्षेत्रका सात विद्यालय आसपासका सडकमा जेब्रा क्रसिङ पुनःरंग्याउने तथा सडक सुरक्षा सम्बन्धी संकेत बोर्ड स्थापना गर्ने योजना अघि बढाइएको छ। यो अभियान विभिन्न रोटर्याक्ट क्लब तथा युवा समूहसँगको सहकार्यमा सञ्चालन गरिएको हो।
आपतकालीन सहयोगतर्फ, सेप्टेम्बर २०२५ को आन्दोलनका क्रममा प्रभावित गौशाला प्रहरी वृत्तलाई क्लबले बत्तीसपुतली युवा समाजसँग सहकार्य गरी राहत सामग्री उपलब्ध गराएको थियो। १५४ जना प्रहरी तथा कर्मचारीका लागि खाद्यान्न, भाँडाकुँडा, ग्यास सिलिन्डर, ट्र्याकसुट तथा कम्प्युटर सामग्री हस्तान्तरण गरिएको थियो।
वातावरण संरक्षण अभियानअन्तर्गत क्लबले २६ जुलाई २०२५ मा टोखास्थित इन्द्रेणी भुतखेल सामुदायिक वनसँग सहकार्य गरी बिरुवा तथा फलफूल नर्सरी स्थापना कार्यक्रम सञ्चालन गरेको थियो। ४०० बिरुवा नर्सरीमार्फत संरक्षण गर्दै पछि रोप्ने व्यवस्था मिलाइएको थियो भने थप ५० वटा धुपीका बिरुवा पनि रोपिएका थिए।
सेवामूलक गतिविधिसँगै क्लबले सदस्यबीच सम्बन्ध विस्तार र सामाजिक योगदानलाई प्रोत्साहन गर्ने उद्देश्यले विभिन्न फेलोसिप कार्यक्रमसमेत आयोजना गरेको छ। भक्तपुर हेरिटेज वाकमार्फत द रोटरी फाउन्डेसनका लागि सहयोग जुटाउने प्रयास गरिएको थियो।
यी सबै गतिविधिले रोटरी क्लब अफ बानेश्वरलाई स्वास्थ्य, शिक्षा, वातावरण संरक्षण र सामुदायिक विकासका क्षेत्रमा सक्रिय, जिम्मेवार र प्रभावकारी सामाजिक संस्थाका रूपमा स्थापित गरेको देखिन्छ। दुर्गम क्षेत्रमा स्वास्थ्य सेवा पुर्याउनेदेखि विद्यालय सुरक्षा र वातावरणीय संरक्षणसम्मका कार्यक्रममार्फत क्लबले “आफूभन्दा माथि सेवा” भन्ने मूल मन्त्रलाई व्यवहारमा उतारिरहेको छ।
