काठमाडौँ । कैलालीको गोदावरी नगरपालिका-४ मा शुक्रबार बिहान गोदावरी नदीको बाढीमा बगेर दुई महिलाको मृत्यु भएको छ। इलाका प्रहरी कार्यालय मालाखेतीका अनुसार स्थानीय ४० वर्षीया कल्पना साउँद र ५५ वर्षीया महेश्वरी धमला नदी तर्ने क्रममा बाढीले बगाएको हो ।
दुवै जनाको शव गोदावरीस्थित आर्यघाट नजिक फेला परेको प्रहरी उपरीक्षक हिरासिंह महराले जानकारी दिए । प्रहरीका अनुसार च्याउ टिप्न बिहानै घरबाट निस्किएका उनीहरू खोला पार गर्ने क्रममा अचानक आएको बाढीमा परेका थिए। चुरे क्षेत्रमा परेको वर्षाका कारण गोदावरी नदीमा जलस्तर बढ्दै बाढी आएको बताइएको छ।
