तस्विर गुगलबाट लिइएको हो । यो तस्विरको समाचारसँग कुनै सम्बन्ध छैन ।
दियोपोस्ट संवाददाता
धादिङ, ३० भदौ । गत भदौ १९ गते जिल्ला अस्पताल धादिङमा जिल्लाकै निलकण्ठ नगरपालिका ७ निवास्वराँकी मखमली थापा आफ्नो पेटमा रहेको गर्भ प्रसुती (डेलीभरी) गराउन पुगीन् । ३५ वर्षिय थापाको गर्भबाट जिल्ला अस्पताल धादिङमै छोरा जन्मियो ।तर साल नाल काट्न गाह्रो भएपछि जिल्ला अस्पताल धादिङले १९ गते नै स्त्रीरोग तथा प्रसुती अस्पताल थापाथलीमा सिफारिस ग¥यो । सोही दिन थापाथली पुगेकी उनलाई २ दिनसम्म राखेर पूर्ण रुपमा स्वस्थ रहेको बच्चासहित २२ गते विदाई गर्यो ।
चार सन्तानकी आमा रहेकी मखमलीको भर्खरै जन्मीएको शिशुसँगै अर्को सन्तान पनि काखमै थियो । एम्बुलेन्समा काठमाडौंबाट धादिङवेशी तर्फ लागेकी उनले पृथ्वीराजमार्ग स्थित धादिङको गजुरी नजिकै जंगलमा पुगेपछि चालकलाई शौच लागेको बताइन् ।
चालकले जंगलबीचमा एम्बुलेन्स रोके । चालक सिटमै थिए । निकैबेर हराएकी उनी एम्बुलेन्समा फर्किइन् ।उनको काखमा शिशु भए नभएको चालकले हेक्का राखेनन् हुँकिए राजमार्ग हुँदै निवस्वाँरा तर्फ । केही बेरको यात्रापछि गाडी निवास्वाँरा पुगेपछि गाडी रोकियो ।
उनी आफ्नो घरमा पुगीन घरमा अन्य ३ सन्तान पनि थिए । चार सन्तानकी आमा मखमलीको श्रीमान केही वर्षअघि नै वितेका थिए ।
घर पुगेकी मखमलीको काखमा भर्खरै जन्भिएको शिशु थिएन । गाउँलेहरुले ‘शिशु खोजे’ तर मखमलीले जवाफ दिइनन् । गाउँलेले प्रहरीलाई खबर गर्यो ।मखमलीलाई शनिबार नै जिल्ला प्रहरी कार्यालयको टोलीले पक्राउ गर्यो । प्रहरीले मखमलीलाई पक्राउ गरेपछि घटनाको अर्को पोल खुल्यो ।
गजुरीस्थित नेपाली सेनाको ब्यारेक अगाडीको भिषण जंगलमा शौच गर्न निष्केकी मखमलीले तीन दिनको आफ्नो शिशुलाई जंगलमै छोडेर अएकी रहिछन् ।जिल्ला प्रहरी कार्यालय धादिङका प्रमुख एसपी राजकुमार बैदवारका अनुसार मखमलीलाई प्रहरीले पक्राउ गरी शिशु हत्याको अभियोगमा अनुसन्धान गरिरहेको छ । उनले आफ्नो गर्भमा कसको सन्तान रह्यो भनेर खुलेर बयान दिएकी छैनन् । तर, प्रहरीले उनले शिशु छाडेको ठाउँमा शिशु खोज्ने क्रम जारी राखेको छ ।
‘हामीले विभिन्न टोली परिचालन गरेर शिशु खोजि रहेका छौँ । हालसम्म शिशुको टालो मात्रै भेटिएको छ,’ प्रहरी प्रमुख बैदवार भन्छन्,‘हामी अनुसन्धानमै छौँ । बच्चा कसैले देखेर लगेको पनि हुनसक्छ ।’
जिल्ला अस्पताल धादिङका मेडिकल रेकर्डर विक्रम विश्वकर्माका अनुसार महिलालाई जिल्ला अस्पतालले थप उपचारका लागि स्त्रीरोग तथा प्रसुती सेवा अस्पताल थापाथलीमा रिफर गरेको थियो । तर, घटनाले नयाँ मोड लिएपछि शिशुकै आमालाई प्रहरीले पक्राउ गरी स्वास्थ्य परिक्षणका लागि जिल्ला अस्पताल ल्याएको उनले बताए ।
