धादिङको एक गाउँपालिकामा भ्रष्टाचार : एउटै मास्कको ९ सय ५० रुपैयाँ

diyopost.com
दियो पोस्ट  शुक्रबार, आश्विन ०१, २०७८ | १०:२०:२१

 

धादिङ । बजारमा एउटा केएन ९५ मास्कको मुल्य कति पर्ला ? न्युनतम ९० रुपैयाँ । यतिबेला एउटा प्याकमा ७ वटा मास्क आउँछ । त्यो प्याकको मुल्य १ सय ६० रुपैयाँ पर्छ । यस्तो मुल्य विवरण अनलाइनमै हेर्न सकिन्छ । तर, धादिङको एक गाउँपालिकाले एउटै मास्कलाई ९ सय ५० रुपैयाँ खर्चिएको पाइएको छ ।

 

कोरोना महामारी नियन्त्रणका लागि भन्दै स्थानिय सरकारले गरेको खर्चको मितव्ययीतामाथि प्रश्न गर्दै महालेखा परिक्षकको ५८ औँ प्रतिवेदनले  उक्त गाउँपालिकाले गरेको भ्रष्टाचारको पोल खोलिएदिएको छ ।

महामारी नियन्त्रणका लागि भन्दै गाउँपालिकाले साढे ४० लाख रुपैयाँ खर्चिएको विवरणमा चरम अनियमितता भएको देखिएको छ । गाउँपालिकाले नागरिकलाई उद्दार गरिएको भन्दै ५ लाख ९३ हजार रुपैयाँ गाडी भाडामै खर्च गरेको देखाएको छ ।

 

संक्रमितहरुको विवरण समेत उपलब्ध नगराई क्वारेन्टिन व्यवस्थापनमा मात्रै १९ लाख ६८ हजार भन्दा बढी रकम खर्चिएको महालेखाले जनाएको छ । ती खर्च मध्ये ५ जना वडाध्यक्षहरुले लगेको १५ लाख रुपैयाँ पेश्की समेत फर्छौट भएको छैन ।

संक्रमितहरुको औषधी उपकरणमा ३ प्रतिशत मात्रै खर्च गरिएको छ भने स्वास्थ्यकर्मी र स्वयंसेवकको भत्तामा ९२ प्रतिशत खर्चिएको महालेखाले जनाएको छ । भत्तामा मात्रै ९ लाख ७० हजार रुपैयाँ सकिएको छ ।

गाउँपालिकाले विवरण समेत उल्लेख नगरि के एन ९५ मास्कलाई प्रति गोटा ९ सय ५० रुपैयाँमा खरिद गरेको छ । जसमा ३ सय १५ वटा मास्कको २ लाख ९९ हजार २ सय ५० रुपैयाँ भुक्तानी दिएको छ ।

महामारी नियन्त्रणको नाममा भएको १४ लाख ३६ हजार रुपैयाँ मनोमानी खर्च गरिएको र मितव्ययी नभएको महालेखाले जनाएको छ ।

 

सम्बन्धित खबर