चोभार सुक्खा बन्दरगाहमा बढ्यो चहलपहल

दियो पोस्ट  

काठमाडौं । चोभार सुक्खा बन्दरगाहमा भन्सार जाँच पासका लागि इलेक्ट्रिक सवारीसाधन आउन सुरु भएको छ । चोभार सुक्खा बन्दरगाहमा सुरु अवस्थामा कन्टेनराइज्ड कार्गो मात्र आउने गरेकामा गत असारबाट चोभार सुक्खा बन्दरगाहामा भन्सार जाँच पासका लागि नयाँ सवारीसधान आउन सुरु गरेको हो ।

हालसम्म साङग्रिला मोटर्स पालि, जिओ अटोमोबाइल प्राणिलगायत अन्य कम्पनीका प्रट्रोलबाट चल्ने ८३ वटा गाडी चोभार भन्सार कार्यालयमा भन्सार जाँच पासका लागि आइसकेका इन्टरमोडल यातायात विकास समितिले जनाएको छ ।

आयातकर्ताले गत शनिबारदेखि इलेक्ट्रिक गाडीसमेत भन्सार जाँच पासका लागि चोभार ल्याउन सुरु गरेका छन् । नेपाल मोटर्स प्राइभेट लिमिटेडले चार वटा इलेक्ट्रिक कार कन्टेरमा राखी चोभार सुक्खा बन्दरगाहमा ल्याएको हो । उक्त गाडी भन्सार जाँच पासका लागि वीरगन्ज नाकाबाट सिधै चोभार सुक्खा बन्दरगाहमा ल्याएको हो । चोभार भन्सार कार्यालयबाट भन्सार जाँच पास प्रक्रिया व्यवस्थित भएपछि सवारीसाधन चोभार आउन थालेका हुन् । आगामी दिनमा अझै थप सवारी चोभार आउने जानकारी आयातकर्ताले गराएका छन् ।

कार्यकारी निर्देशक श्री आशिष गजुरेलले चोभार सुक्खा बन्दरगाह पूर्ण क्षमतामा सञ्चालनमा ल्याउनका लागि कन्टेनराइज्ड मालवस्तु एवं नयाँ सवारीसाधन चोभार सुक्खा बन्दरगाहमा भन्सार जाँच पासका लागि ल्याउन आयातकर्तासँग पटक पटक छलफल भएको जानकारी दिए ।

चोभार सुक्खा बन्दरगाह भन्सार कार्यालयमा भन्सार जाँच पासका लागि आउने मालवाहक सवार साधन एवं नयाँँ सवारीसाधनका लागि प्रवेश निःशुल्क गर्नुका साथै पाकिङ एंव गोदाम शुल्कसमेत न्यूनतम गरी समितिले स्तरीय सेवा प्रदान गरिरहेको छ । जसका कारण हालसम्म चोभार सुक्खा बन्दरगाहमा २०२ वटा कन्टेनर र ८७ (८३ वटा प्रट्रोल र चार वटा इलेक्ट्रिक) नयाँ गाडी भन्सार जाँच पासका लागि आइसकेको र आउने क्रम निरन्तर रुपमा बढिरहेको छ ।

साथै सुक्खा बन्दरगाहको एक्जिम क्षेत्रमा भएका दुई वटा गोदाम पनि आयातकर्ताले सामान भण्डारका लागि प्रयोग गर्ने गरेका छन् भने आन्तरिक टर्मिनलको पार्किङ एवं गोदाम प्रयोगका लागि आउने व्यवसायीको सङ्ख्यासमेत बढ्दो क्रममा रहेको समितिले जनाएको छ ।

आजको गोरखापत्र पत्रिकामा समाचार छ ।