चर्चित भारतीय अभिनेता नाना पाटेकरको ७५ वर्षको उमेरमा निधन

काठमाडौँ । चर्चित भारतीय अभिनेता नाना पाटेकरको ७५ वर्षको उमेरमा निधन भएको छ । पाटेकरको बिहीबार बिहान गोवास्थित आफ्नै निवासमा हृदयाघातका कारण निधन भएको भारतीय सञ्चारमाध्यमले जनाएका छन् ।

गोवाको डोना पाउलास्थित अपार्टमेन्टमा बेहोस अवस्थामा भेटिएपछि उनलाई तत्काल अस्पताल लगिएको थियो । अस्पतालका चिकित्सकहरूले करिब ४५ मिनेटसम्म निरन्तर सीपीआर दिए पनि उनलाई बचाउन नसकिएको जनाइएको छ । अस्पतालले बिहान करिब ५ः२० बजे उनलाई मृत घोषणा गरेको थियो ।

पाटेकरका छोरा मल्हार पाटेकरले आफ्ना बुबाको निधन भएको बताएका छन् । घटनाबारे चिकित्सकीय तथा कानुनी प्रक्रिया अघि बढाइएको र पोस्टमार्टम गरिने भारतीय सञ्चारमाध्यमले जनाएका छन् ।

पाटेकरको निधनले भारतीय चलचित्र क्षेत्रमा शोक छाएको छ । वरिष्ठ पत्रकार राजदीप सरदेसाईले सामाजिक सञ्जालमार्फत श्रद्धाञ्जली व्यक्त गर्दै पाटेकर उत्कृष्ट अभिनेता मात्र नभई असल मित्रसमेत रहेको बताएका छन् ।

सरदेसाईका अनुसार निधन हुनुभन्दा एक दिनअघि मात्र पाटेकरसँग उनको कुराकानी भएको थियो । त्यस क्रममा पाटेकरले ‘कालजी घे राजा’ अर्थात् ‘आफ्नो ख्याल राख्नु, राजा’ भनेका थिए । सरदेसाईले पाटेकरलाई पर्दामा मात्र नभई व्यक्तिगत जीवनमा समेत सधैँ सम्झिरहने बताएका छन् ।

केन्द्रीय मन्त्री नितिन गडकरीले पनि पाटेकरको निधनप्रति दुःख व्यक्त गरेका छन् । उनले पाटेकरको निधन भारतीय चलचित्र क्षेत्रका लागि ठूलो क्षति भएको बताएका छन् ।

गडकरीले पाटेकरसँग आफ्नो निकट तथा मित्रवत् सम्बन्ध रहेको उल्लेख गर्दै उनको दमदार अभिनयले पाँच दशकभन्दा लामो समयसम्म मराठी र हिन्दी चलचित्रका दर्शकको मन जितेको बताएका छन् । उनको विशिष्ट संवाद प्रस्तुति र अभिनय शैलीले चलचित्रका धेरै पात्रलाई अविस्मरणीय बनाएको गडकरीको भनाइ छ ।

नाना पाटेकर अभिनयसँगै सामाजिक सेवामा पनि सक्रिय थिए । ‘नाम फाउन्डेसन’मार्फत महाराष्ट्रका ग्रामीण क्षेत्रमा जल संरक्षण तथा जलग्रहण क्षेत्र व्यवस्थापनका क्षेत्रमा उनले काम गरेका थिए । आत्महत्या गरेका किसानका परिवारलाई सहयोग गर्दै आएका उनले ग्रामीण क्षेत्रका धेरै परिवारलाई राहत र सहारा प्रदान गरेका थिए ।

पाटेकर हिन्दी र मराठी चलचित्रका प्रभावशाली अभिनेताका रूपमा परिचित थिए । ‘परिन्दा’, ‘क्रान्तिवीर’, ‘अग्निसाक्षी’, ‘खामोशीः द म्युजिकल’, ‘अब तक छप्पन’, ‘वेलकम’ र ‘नटसम्राट’ लगायतका चलचित्रमा उनको अभिनयले व्यापक प्रशंसा पाएको थियो । उनी राष्ट्रिय चलचित्र पुरस्कारबाट सम्मानित हुनुका साथै सन् २०१३ मा पद्मश्रीबाट समेत सम्मानित भएका थिए ।

पछिल्लो समय पनि उनी चलचित्र र ओटीटीमा सक्रिय थिए । सन् २०२६ मा उनी विशाल भारद्वाज निर्देशित ‘ओ’रोमियो’मा देखिएका थिए । त्यसैगरी अनिल कपुर अभिनीत ‘सुबेदार’मा पनि उनले अभिनय गरेका थिए ।

सन् २०२६ मै पाटेकरले प्रकाश झाको राजनीतिक ड्रामा शृङ्खला ‘संकल्प’मार्फत ओटीटीमा समेत आफ्नो उपस्थिति जनाएका थिए ।

रंगमञ्च, चलचित्र र टेलिभिजन हुँदै लामो अभिनय यात्रामा आफ्नो छुट्टै पहिचान बनाएका पाटेकरको निधनलाई भारतीय चलचित्र क्षेत्रमा ठूलो क्षतिका रूपमा लिइएको छ ।